एक हप्तापछि उपत्यकाको फोहोर उठ्दै

२० चैत, काठमाडौं । एक हप्तादेखि नउठेको काठमाडौं उपत्यकाको फोहोर शुक्रबारदेखि उठ्दै छ । शुक्रबार काठमाडौं महानगरपालिका र आन्दोलनरत पक्षबीच सहमति भएपछि उपत्यकाको फोहोर उठ्न लागेको हो ।

सिसडोल  फोहोरमैला प्रभावित क्षेत्र शिक्षक व्यवस्थापन संघर्ष समिति र स्थानीय बसिन्दाहरुले विभिन्न माग राख्दै चैत १३ गतेदेखि सडकमा विरोध प्रदर्शन गरी फोहोर फल्नमा अवरोध गर्दै आएका थिए । सहमतिमा र नुवाकोटको ककनी गाउँपालिका र धादिङको धुनिबेसी नगरपालिकाले पूर्वाधार विकासका लागि आगामी आर्थिक वर्षमा काठमाडौं महानगरले तीन तीन करोड दिने भएको छ ।

प्रभावित क्षेत्रका विद्यालयहरुमा संघीय सरकारबाट स्थायी दरबन्दी आएपछि स्वतः हट्ने गरी तत्कालका लागि ५१ जना शिक्षकको खर्चका लागि महानगरपालिकाले अनुदान दिने प्रतिवद्धता व्यक्त गरेको छ । त्यस्तै प्रभावित क्षेत्रमा १५ बेडको अस्पताल सञ्चालनका लागि पूर्वाधार निर्माण गर्ने र डाक्टरका लागि आवश्यक रकम सहयोग महानगरले गर्दै छ ।

स्थानीय प्रभावित क्षेत्रमा जग्गा अधिग्रहण गर्न संघ सरकारसँग अनुरोध गर्ने र सिसडोलको पोस्ट क्लोजर गर्नेबारे पनि काठमाडौं महानगर र आन्दोलनरत पक्षबीच सहमति भएको छ ।