यो बर्षमा ४ चलचित्र मात्र रिलिज

काठमाडौं । यो बर्ष कोरोना महामारीको प्रभावमा परेको नेपाली चलचित्र बजारमा बर्षभरी चार वटा मात्र चलचित्र रिलिज भएका छन् । १० महिना लामो लकडाउनका कारण सुनसान बनेको चलचित्र क्षेत्र पौषदेखि केहि मात्रामा चलायमान भएको थियो ।

माघ १ गतेबाट मल्टिस्टारमा चलचित्र ‘एउटा यस्तो प्रेम कहानी’ रिलिज भयो । चलचित्रमा शिव श्रेष्ठ, प्रियंका कार्की, वर्षा राउत, आयुष्मान देशराज जोशी, संजोग कोइराला, शक्ति श्रेष्ठ, कविता मानन्धर लगायतका कलाकारले अभिनय गरेका थिए । लामो समयपछि चलचित्र हलमा लागेको यो चलचित्रले दर्शक तान्ने अपेक्षा गरिएको थियो । तर, चलचित्रले भने दर्शक तान्न सकेन ।

त्यसपछि चलचित्र ‘गोर्खे’ पनि यो बर्ष रिलिज भयो । तर, यो चलचित्रले पनि दर्शकलाई तान्न सकेन । यो बर्षको अन्तिम शुक्रबार अर्थात आजबाट २ वटा नेपाली चलचित्र रिलिज भएका छन् । कलाकार सन्दिप क्षेत्रीको मुख्य भूमिका रहेको चलचित्र ‘श्री’ र नायक मुकेश ढकालको मुख्य भूमिका रहेको चलचित्र ‘गुड फ्रेन्ड्स’ आजबाट रिलिज भएका छन् ।

अहिले नेपालमा कोरोना भाईरसको दोस्रो लहर चलेसंगै रिलिज मिति तोकेका चलचित्रहरु धमाधम स्थगित भईरहेका छन् । यो बर्ष कोरोना कहरका कारण पनि नेपाली चलचित्रले निक्कै ठूलो घाटा व्यहोरेको छ ।