यो साता कुन कम्पनीको शेयरमूल्य उच्चदरले बढ्यो ?

३ बैंशाख, काठमाडौं । यो साता शेयरबजारमा नेप्से परिसूचकले हालसम्मको उच्च विन्दू कायम गरेको छ । यो साता नेप्से परिसूचक २७ सय विन्दू पार गरेको हो । साताको अन्तिम कारोबार दिन नेप्से २० दशमलव ६१ अंकले बढेर २७ सय ३५ विन्दूमा पुगेको छ ।

नयाँ वर्षको सुरुवातसँगै नेप्सेले नयाँ उचाई कायम गर्दा शेयरबजारमा बहार छाएको छ । यो साता कारोबारमा आएका कम्पनीहरु मध्येमा एनआईसी एशिया लघुवित्तको शेयर सबैभन्दा बढि बढेको हो ।

यो साता तीन दिन खुलेको बजारमा लघुवित्तको शेयरमा सकारात्मक सर्किट लागेर कारोबार भएको हो । यो साताको पहिलो कारोबार दिन लघुवित्तको प्रतिकित्ता शेयरमूल्य १४ सय ५ रुपैयाँबाट बढेर अन्तिक कारोबार दिनसम्म १८६८ रुपैयाँ पुगेको छ । तीन कारोबार दिनमा लघुवित्तको शेयरमूल्य ४६३ रुपैयाँले बढेको हो ।

केही समय अगाडि चन्द्रागिरिको शेयरमा करिब २ महिनाको अवधिसम्ममा लगातार सर्किट लागेर कारोबार भयो भने, पछिल्लो दुई साता यता भने एनआईसी एशिया लघुवित्तको शेयरमा लगातार सर्किट लागेर कारोबार भइरहेको छ ।

किन एनआईसी एशिया लघुवित्तको शेयरमा दिनदिनै सर्किट लाग्यो ?

हालैै एनआईसी एशिया लघुवित्तले स्वदेशी लघुवित्त वित्तीय संस्थालाई गाभेर एकीकृत कारोबार सुरु गरेको हो । लघुवित्तले एकीकृत कारोबार सुरु भएसँगै दैनिक कम्पनीको शेयरमा सर्किट लाग्न थालेको हो । मर्जर पश्चात कम्पनी वित्तीय अवस्था बलियो देखिएपछि शेयरखरिदकर्ताको चाप बढेसँगै कम्पनीको शेयरममूल्य सर्किट लागेको हो ।

कति छ कम्पनीको प्रतिकित्ता शेयरमूल्य ?

हाल कम्पनीको प्रतिशेयरमूल्य १८ सय ६८ रुपैयाँ रहेको छ । करिब तीन हप्ता पहिले कम्पनीको शेयरमूल्य एक हजार कम मूल्यमा कारोबार भइरहेको थियो । दुई सातामै एक हजार रुपैयाँले कम्पनीको शेयरमा परिवर्तन देखिएको हो ।