साढे तीन वर्षपछि कांग्रेस सत्ता पक्षमा

५ वैशाख, सुर्खेत । करिब साढे तीन वर्ष प्रतिपक्षी बेञ्चमा बसेको नेपाली कांग्रेसको सत्ता यात्रा फेरि सुरु हुने भएको छ । यसको थालनी कर्णाली प्रदेशबाट हुने देखिएको हो ।

अस्ती मात्र महेन्द्रबहादुर शाही नेतृत्वको सरकारलाई विश्वासको मत दिएको काँग्रेस प्रतिपक्षीबाट अब सत्ता पक्षमा परिणत भएको छ । तर मन्त्रालयबारे भने अझै कुरा टुंगिसकेको छैन । सम्भवतः भरे भोलिसम्म मन्त्रालयबारे टुँगो लाग्ने अनि सत्ता यात्रा सुरु हुने बताइएको छ ।

कांग्रेस संसदीय दलका नेता जीवनवहादुर शाहीले मुख्यमन्त्रीसँग छलफल गरेपछि मात्रै यसबारे टुंगो लाग्ने बताए । प्रदेशमा मुख्यमन्त्रीको कार्यालयका साथै विभिन्न सात मन्त्रालय रहेका छन् ।

शाही नेतृत्वको सरकार विरुद्ध नेकपा एमालेले अविश्वास प्रस्ताव दर्ता गराएको थियो । तर मतदानका बेला एमाले पक्षकै माधवकुमार नेपाल पक्षका चारजना सांसद्ले फ्लोर क्रस गरेर शाही सरकार जोगाएका थिए ।