नायिका केकीलाई कोरोना संक्रमण

काठमाडौं । नायिका केकी अधिकारीलाई कोरोना संक्रमण भएको छ । केकीले पहिलो पटक कोरोना टेष्ट गर्दा पोजिटिभ देखिएपछि विश्वास नलागेर पुन दोश्रो पटक टेष्ट गरेकी थिइन् । उनको दोश्रो पटक पनि कोरोना पोजिटिभ रिपोर्ट आएको छ । अहिले केकी होम क्वारेन्टाइनमा रहेकी छिन् ।

केकीलाई कोरोना संक्रमण भएपछि सोमबारदेखि छायांकनमा जाने तयारीमा रहेको चलचित्र ‘घिन्ताङ’को सेड्यूल प्रभावित बनेको छ । ‘घिन्ताङ’मा नायिका केकी अधिकारी मुख्य भूमिकामा छिन् ।

दिपक श्रेष्ठको निर्देशनमा तयार हुन लागेको चलचित्रको छायांकन यसअघि पनि निर्देशक दीपक श्रेष्ठलाई कोरोना पोजिटिभ देखिएको कारण प्रभावित बनेको थियो । केकीको रिपोर्ट नेगेटिभ आएसँगै चलचित्र छायांकन सुरु हुने निर्माणपक्षले बताएको छ ।