स्वतन्त्र र भयरहित वातावरणमा अल्बानियामा संसदको चुनाव शुरु

१२ बैशाख, टिराना । पूर्वी युरोपेली मुलुक अल्बानियामा आइतबार संसदको चुनाव शुरु भएको छ । प्रधानमन्त्री एडी रामाले आइतबार बिहानै एक सन्देश जारी गर्दै स्वतन्त्र र भयरहित चुनावको वातावरण निर्माण गर्न सबैसँग आग्रह गर्नु भएको छ । उनी पनि तेस्रो कार्यकालका लागि चुनावी मैदानमा छन् । प्रधानमन्त्री रामाले आफ्नो पार्टी सोसलिष्ट चुनावमा बहुमत नल्याए पद त्याग्ने घोषणा गरेका छन् ।

चुनावमा एक दर्जन विपक्षी दलहरुले डेमोक्र्याट्स नामको गठबन्धन बनाउँदै प्रधानमन्त्री रामालाई चुनौती दिँदैछन् । डेमोक्र्याट्सका नेता लुलजिम बाशाले आफ्ना समर्थकहरुलाई सम्बोधन गर्दै प्रधानमन्त्री रामाले दुई कार्यकालमा अल्बानियालाई बर्बाद गरेकाले अब उनलाई मौका दिन नहुनेमा जोड दिए।

चुनावमा सहभागी सबै दल युरोपेली युनियनको सदस्यता लिने पक्षमा उभिएका छन् । जनमत सर्वेक्षणमा रामाको समाजवादी पार्टीले अन्य विपक्षीको तुलनामा अग्रता लिएको देखिएको छ । रामाप्रति रुष्ट देखिएका राष्ट्रपति एलिर मेटाले आइतबार सबेरै टिरानाको एक मतदान केन्द्रमा गई मतदान गरेका छन् ।

करिब २८ लाख जनसंख्या रहेको अल्बानिया युरोपकै सबैभन्दा गरिब मुलुक हो । कोरोना भाइरस महामारीले अल्बानियाको अर्थव्यवस्था र जनजीवन निकै प्रभावित बनाएको छ । अल्बानियाको विदेशी मुद्राको प्रमुख स्रोत पर्यटन क्षेत्रमा व्यापक गिरावट आएपछि देशकै अर्थतन्त्रमा असर परेको छ ।

प्रधानमन्त्री रामाले आगामी मे महिनाको अन्त्यसम्ममा करिब पाँच लाख अल्बानियालीलाई कोभिड विरुद्धको खोप दिइसक्ने प्रतिबद्धता व्यक्त गरेकाे समाचारमा उल्लेख छ  । एएफपी