निषेधाज्ञा जारी पछि राजधानी छाडी थातथलो फर्कनेहरुको लहर

१४ बैशाख, काठमाडौं । आज विहानदेखि काठमाडौं उपत्यका छाडी आफ्नै थातथलो फर्कनेहरुको संख्या बढेको छ । बसपार्क, कोटेश्वर, कलंकी, बल्खु लगायत काठमाडौंका बाहिरिने नाकाहरुमा विहानै देखि लामो तथा छोटो दूरीमा जाने यात्रुहरुको भिड लागेको छ । हिजोको तुलनामा आज विहानै देखि लामो तथा छोटो दूरीका यात्रुहरुको बसपार्कहरुमा भिड लागेको र बहिर जाने सवारीको चाँप पनि बढेको प्रहरीले जनाएको छ ।

अघिल्ला दिनहरुको तुलनामा ठूलो संख्यामा यात्रुहरु बसपार्कमा चोक चोकमा गाडी कुरिरहेको देख्न सकिन्छ । यता आन्तरिक उडान तर्फको हवाइ भाडा उच्चतम् विन्दुमा पुगेको छ भने टिकट पनि पाउन छाडेको गुनासो यात्रुहरुले गरेका छन् ।

सक्रमण फैलिएका विभिन्न नौ जिल्लामा निषेधाज्ञा जारी गर्दै सरकारले घर फर्कनेका लागि २ दिनको समय दिएको छ । सक्रमणको चेक ब्रेक गर्न भन्दै सरकारले काठमाडौं उपत्यकामा १६ गते देखि बैशाख महिनाभार निषेधाज्ञा जारी गर्ने निर्णय गरेको छ।