खोपमा भ्रष्टाचार गर्नु अमानवीयता, अनैतिकता र गैरजिम्मेवारीको पराकाष्ठा: देउवा

२४ बैशाख, काठमाडौं । नेपाली कांग्रेसका सभापति शेरबहादुर देउवाले खोप खरिदमा भएको भ्रष्टाचार प्रकरणले सरकारको अनैतिक चरित्र उदाङ्गो भएको बताएका छन् ।कमिसनका कारण कोरोनाको खोप आउन नसक्नु अक्षम्य अपराध भएको बताउदै सभापति देउवाले कोरोना भाइरसको संक्रमण नियन्त्रण र रोकथामका लागि पर्याप्त समय पाउँदा पनि सरकारले जिम्मेवारी बोध नगरेको र समयमा खोपसमेत व्यवस्था नगरेको उनको आरोप लगाए ।

शुक्रबार विज्ञप्ति जारी गर्दै कांग्रेस सभापति देउवाले कमिसनका कारण खोप आउन नसकेको सार्वजिाक भएको बतएका छन् । ‘जनताको जीवन रक्षा गर्ने औषधिमा पनि भ्रष्टाचार गर्नु अमानवीयता, अनैतिकता र गैरजिम्मेवारीको पराकाष्ठा र जनता विरुद्धको अक्षम्य अपराध हो’ उनले भनेका छन्, ‘जनताको जीवन रक्षा गर्नुपर्ने सरकार स्वयं जिवनदायीनी औषधि ‘खोप’ भ्रष्टाचारमा संलग्न हुनुले यो सरकारको अनैतिक चरित्र उदाङ्गो भएको छ ।’

उनले यसमा संलग्नहरुलाई कारबाही गर्न माग गरेका छन् । साथै जनताको जीवन रक्षा गर्न आवश्यक अक्सिजन, आईसीयू बेड, खोपलगायतका औषधीको तत्काल व्यवस्था गर्न माग पनि गरेका छन् । विज्ञहरुले कोभिडको पटक–पटक लहर आउन सक्ने, जुनसुकै बेला जोखिम बढ्न सक्ने भनी दिएको चेतावनीलाई सरकारले नसुनेको आरोप लगाएका छन्।

अहिले कमीशनको कारण खोप आउन नसकेको कुरा सार्वजनिक भईसकेको छ । सरकार सर्वत्र भ्रष्टाचारमा चुर्लुम्म डुबेको विषय नेपाली जनताका लागि नौलौ होईन । जनताको जिवन रक्षा गर्ने औषधीमा पनि भ्रष्टाचार गर्नु अमानवियता, अनैतिकता र गैरजिम्मेवारीको पराकाष्ठा र जनता विरुद्धको अक्षम्य अपराध हो । pic.twitter.com/AM1e25uQ3f

— Sher Bahadur Deuba (@DeubaSherbdr) May 7, 2021

उनले देशमा व्याप्त यस विषम घडीमा सबै दाजुभाई, दिदीबहिनीमा स्वास्थका मापदण्ड अपनाउन, आफू र आफ्नो परिवारलाई सुरक्षित राख्न अनुरोध गरेका छन्। साथै देशभरिका नेपाली कांग्रेसका सदस्य तथा शुभेच्छुक साथीहरुलाई स्वास्थ सुरक्षाका मापदण्ड अपनाउदै संकटमा परेकालाई सक्दो सहयोग गर्न अपिल पनि गरेका छन्।