साइकल अनियन्त्रित भई पोलमा ठक्कर खाँदा १ जनाको मृत्यु

२७ वैशाख, भक्तपुर । भक्तपुरमा साइकल अनियन्त्रित भई पोलमा ठक्कर खाँदा १ जनाको मृत्यु भएको छ । सूर्यविनायक नगरपालिका-८ सिपाडोलस्थित सडकमा साईकल अनियन्त्रित भई विद्युतको पोलमा ठोक्किएर आइतबार दिउँसो दुर्घटना हुँदा साइकलमा सवार सिपाडोल बस्ने दोलखा मेलुङ गाउँपालिका-३ घर भएका मदन राज थापाको १० वर्षीय छोरा करुण थापाको मृत्यु भएको छ ।

दुर्घटनामा गम्भीर घाइते भएका उनको मध्यपुर अस्पतालमा उपचारको क्रममा मृत्यु भएको हो । साथै दुर्घटनामा घाइते भएका साइकल चालक सिपाडोल बस्ने १३ वर्षीय सुरेश घतानीको सोही अस्पतालमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।