अरुण भ्याली हाइड्रोपावरको शेयरमा खरिद माग उच्च, यस्तो छ कारण ?

२ जेठ, काठमाडौं । अरुण भ्याली हाइड्रोपावर कम्पनीको शेयर खरिद गर्न क्रेताको भिड लागेको छ । यस दिन कम्पनीको शेयरमा साढे ५ लाख कित्ता शेयर खरिद आदेश आएको छ ।

आइतबार १२ः४० बजेको अवधिसम्ममा कम्पनीको शेयरमा साढे ५ लाख कित्ता शेयर खरिद आदेश आउदा ५७ हजार कित्ता शेयर बिक्री आदेश रहेको छ । पछिल्ला दिनहरुमा कम्पनीको शेयर खरिद माग उच्च रहेको छ ।

वैशाख ६ गतेदेखि कम्पनीले हकप्रद शेयर बिक्री खुल्ला गरेको हो कम्पनीको हकप्रद खुल्ला भएसँगै शेयर खरिद गर्नेको भिड लागेको हो । आज कम्पनीको हकप्रदमा आवेदन दिने अन्तिम दिन पनि हो ।

कम्पनीले ५० प्रतिशत दरको प्रतिशेयर  १०० अंकित मूल्यमा ५२ लाख ४१ हजार १९७ कित्ता हकप्रद शेयर विक्री खुला गरेको हो । हाल कायम चुक्तापूँजी १ अर्ब ४ करोड ८२ लाख ३९ हजार ४०० को आधारमा कम्पनीले १ बराबर शून्य दशमलव ५ को अनुपातमा उक्त हकप्रद शेयर विक्री गरेको हो ।

हकप्रद शेयर पश्चात कम्पनीको चुक्तापूँजी  १ अर्ब ५२ करोड २४ लाख भन्दा बढी पुग्नेछ । यो हकप्रद शेयरमा २०७७ चैत ८ गते सम्म कायम शेयरधनीले मात्र आवेदन दिन सक्नेछन् ।