आज जसपाका दुई अध्यक्षबीच सघन वार्ता हुँदै

२ जेठ, काठमाडौं । जनता समाजवादी पार्टी ‘जसपा’ मा विवाद बढेपछि आज दुई अध्यक्षबीच सघन वार्ता हुँदैछ। जसपाका दुई अध्यक्ष महन्थ ठाकुर र उपेन्द्र यादवबीच आज वार्ता हुन लागेको हाे ।

जसपा कार्यकारिणी समिति सदस्य सुरेन्द्र झाले पार्टीमा देखा परेको समस्याका बारेमा नै दुई अध्यक्षबीच बसेर छलफल गर्न लागेकाे बताए । उनका अनुसार दिउँसो साढे १ बजे दुई अध्यक्ष पार्टी केन्द्रीय कार्यालय बालकुमारीमा वार्तामा बस्न लागेका हुन्।

एक वर्षअघि तत्कालीन समाजवादी पार्टी र राष्ट्रिय जनता पार्टी मिलेर जसपा बनेको थियो। वैकल्पिक सरकार गठनको विषयमा पछिल्लो समय जसपाभित्रको विवाद चुलिएको छ।

महन्थ-राजेन्द्र पक्षले प्रधानमन्त्री केपी ओलीको नेतृत्वको सरकारकै पक्षमा देखिएका छन्। उपेन्द्र-बाबुराम केपी ओलीबाहेकको सरकार निर्माणको पक्षमा थिए। जसपाभित्रको विवादकै कारण वैशाख २७ गते प्रधानमन्त्रीले विश्वासको मत गुमाएपछि त्यसपछि संयुक्त सरकार निर्माण हुन सकेन।