सर्वोच्च जानका लागी नागरिकतासहित संसद भवनमा भेला हुन सांसदहरुलाई निर्देशन

९ जेठ, काठमाडाैं ।  प्रतिनिधिसभा विघटनविरुद्ध विपक्षी गठबन्धनका १४९ सांसदले सामूहिक रुपमा रिट दर्ता गराउने तयारी थालेका छन् । शुक्रबार मध्यरातमा संसद विघटन गराएपछि त्यसविरुद्ध आक्रामक रुपमा लागेको विपक्षी गठबन्धनका ती सांसदहरु सर्वोच्च अदालतमा रिट दायर गर्ने निर्णयमा पुगेका हुन् ।

संसद विघटनविरुद्ध रिट हाल्न विपक्षी गठबन्धनका नेताहरु आज सर्वोच्च अदालत जाने तयारी गरेका छन् । त्यसको तयारीका लागि दलहरुले आफ्ना सांसदहरुलाई नागरिकतासहित संसद भवनमा भेला हुन निर्देशन दिएका छन् । आज तयारी सकिए आजै, नभए भोलि सर्वोच्च जाने उनीहरुको तयारी छ ।

नेपाली कांग्रेसका सचेतक पुष्पा भुसालले नेपालबहस डटकमसँगकाे कुराकारानीमा सकेसम्म आजै सर्वोच्च अदालत जाने तयारीमा आफूहरु रहेको बताइन् ।

शनिबार नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, एमालेका वरिष्ठ नेता माधव कुमार नेपाल, जसपा अध्यक्ष उपेन्द्र यादव र राष्ट्रिय जनमोर्चाका उपाध्यक्ष दूर्गा पौडेलको संयुक्त बैठकले संसद विघटनको कानुनी र राजनीतिक लडाइँ लड्ने निर्णय गरेको थियो ।

विपक्षी गठबन्धनका बहुमत सांसदहरुको समर्थन रहेको दाबीसहित कांग्रेस सभापति शेरबहादुर देउवाले प्रधानमन्त्रीमा दाबी गरेका थिए । तर दाबी नपुगेको भन्दै सरकारको सिफारिसमा राष्ट्रपति विद्यादेवी भण्डारीले शुक्रबार मध्यराति संसद विघटन गरी आगामी कात्तिक २६ र मंसिर ३ गते नयाँ निर्वाचनको मिति घोषणा गरेकी थिइन् ।