आजै जसपा मन्त्रिमण्डलमा

१० जेठ, काठमाडौं । प्रधानमन्त्री केपी ओलीको सत्ता संजीवनी बूटी बनेको जनता समाजावादी पार्टीको महन्थ–राजेन्द्र समूह आजै मन्त्रिमण्डलमा सामेल हुने भएको छ । भरे साँझसम्म ओलीले राजेन्द्र महतोलाई उपप्रधानमन्त्रीसहित आपूर्ति मन्त्रालय दिने गरी पुनर्गठन गर्ने भएका छन् ।

जसपा अध्यक्ष महन्थ ठाकुरसँग हिजै ओलीले सहमति गरिसकेका छन् । सहमति अनुसार, जसपाले ८ मन्त्रालयसहित १० जना मन्त्री बनाउने छ । जसमा ८ क्याबिनेट र दुई जना राज्यमन्त्री रहने छन् ।

मन्त्री हुनेहरुमा शरत्सिंह भण्डारी, राजकिशोर यादव, प्रमोद साहलगायत रहेका छन् । कसलाई के मन्त्रालय दिने भन्नेबारे ठाकुर र महतोबीच अहिले सल्लाह भइरहेको स्रोतले बतायो । उता, जसपाकै उपेन्द्र यादव समूहले भने ओली मन्त्रिमण्डलमा जानेहरुमाथि कारबाही गर्ने चेतावनी दिइसकेको छ ।