अबिरल बर्षाले स्याङ्जामा २ को मृत्यु, ६ जना गम्भिर घाइते

२ असार, स्याङ्जा । स्याङ्जाको भीरकोटमा जिप दुर्घटना हुँदा एक जना र आँधीखोलाले बगाएर एक जनाको मृत्यु भएको छ । जीप दुर्घट्नामा ६ जना गम्भिर घाईते भएका छन् । भीरकोटको बानेथोकबाट बयारघारी बजारका लागि छुटेको ग १ ज ४९४० नम्वरको महिन्द्रा जिप भीरकोट ४ कै सेन्थुम्का नजिकै दुर्घटनामा परेको हो ।

दुर्घट्नमा परेर घाईते भएका भीरकोट ३ का अन्दाजी ४३ बर्षका बिन्दु अधिकारीको उपचारका क्रममा कालिका सामुदायिक अस्पताल हेलुमा मृत्यु भएको प्रहरीले जनाएको छ । त्यस्तै अन्य ६ जना घाईतेहरुको पनि हेलुमा प्राथमिक उपचार गरी थप उपचारका लागि पोखरा रिफर गरिएको भीरकोट ५ का वडा अध्यक्ष याम प्रसाद अधिकारी लक्ष्मणले जानकारी दिए । घाईतेहरु सबै भीरकोट ३ का हुन् । अबिरल बर्षाका कारण सडक चिप्लो हुँदा र्दुघटना भएको हुन सक्ने प्रहरीको अनुमान छ ।

आँधीखोलाले बगाएर आँधीखोला गाँउपालिका ६ बस्ने बर्ष ५७ का घनश्याम ढकालको मृत्यु भएको जिल्ला प्रहरी कार्यालय स्याङ्जाका प्रबक्ता राजेन्द्र अधिकारीले जानकारी दिए । अधिकारीका अनुसार मंगलबार रातीदेखि हराएका ढकाल बुधबार बिहान भीरकोट ५ स्थित आँधीखोला किनारमा मृत फेला परेका थिए । आँधीखोलाले बगाएको वा अन्य तबरबाट उनको निधन भएको बिषयमा अनुसन्धान भइरहेको प्रहरीले जनाएको छ ।