आज तराई क्षेत्रमा धेरै पानी पर्ने सम्भावना

६ असार, काठमाडौं । जल तथा मौसम पूर्वानुमान महाशाखाले आज तराई क्षेत्रमा धेरै पानी पर्ने सम्भावना रहेको जनाएको छ । अहिले प्रदेश-१, दुई र सुदूरपश्चिम प्रदेशको थोरै र बाँकी प्रदेशका एक-दुई ठाउँमा पानी परिरहेको महाशाखाले मौसमी बुलेटिन मार्फत जनाएको हो ।

दिउँसो पनि मौसम बदली हुने र धेरै ठाउँमा पानी पर्ने बुलेटिनमा उल्लेख छ । आज दिउँसो प्रदेश-१, प्रदेश-तथा वाग्मतीका थोरै ठाउँमा र बाँकी गण्डकी, लुम्बिनी, कर्णाली र सुदूरपश्चिम प्रदेशका एक वा दुई ठाउँमा मेघगर्जन-चट्याङ्गसहित ठूलो पानी पर्ने सम्भावना रहेको महाशाखाले जनाएको छ ।

आज तुलनात्मक रुपमा तराई क्षेत्रमा धेरै पानी पर्ने र काठमाडाैं उपत्यकामा पनि दिउँसोपख पानी पर्ने सम्भावना रहेको छ। त्यस्तै आज राती प्रदेश-१, प्रदेश-२ तथा वाग्मती प्रदेशका थोरै ठाउँमा ठूलो पानी पर्ने अनुमान छ ।

ठूलो पानी पर्ने क्षेत्रमा बाढी पहिरोको समेत सम्भावना रहेकाले सतर्कता अपनाउन महाशाखाले आग्रह गरेको छ । अहिले देशभर मनसुनी वायुको प्रभाव रहेको छ । अझै केही दिन निरन्तर पानी पर्ने देखिएको पनि महाशाखाले जनाएको छ ।