प्रुडेन्सियल इन्स्योरेन्सको सभाले पारित गर्यो ८ दशमलव ४२ प्रतिशत लाभांश

६ असार, काठमाडौं । प्रुडेन्सियल इन्स्योरेन्स कम्पनी साधारणसभाले लाभांश पारित गरेको छ । कम्पनीको १९ औं वार्षिक साधारण सभाले ८ दशमलव ४२ प्रतिशत लाभांश पारित गरेको हो।

आज असार ६ गते होटेल ईच्छा प्रालि सिमरा, बारामा आयोजित सभाले आठ प्रतिशत बोनस शेयर र शून्य दशमलव ४२ प्रतिशत कर प्रयोजनार्थ नगद लाभांश दिने प्रस्ताव सर्वसम्मतिबाट पारित गरेको छ ।

साविक १ अर्ब २ करोड ६४ लाख ३२ हजार रुपैयाँ चुक्तापूँजीबाट बोनश शेयर पश्चात कम्पनीको चुक्तापूँजी १ अर्ब १० करोड ८५ लाख ४६ हजार ५६० रुपैयाँ पुगेको छ ।

सभाले सञ्चालक समितिको तर्फबाट अध्यक्ष विशाल अग्रवालद्धारा प्रस्तुत आर्थिक वर्ष २०७६/७७ को वार्षिक प्रतिवेदन सर्वसम्मत रुपमा पारित गरेको छ ।

वार्षिक साधारण सभाबाट कम्पनीको संस्थापक समूह ख अन्तर्गत दुई जना सञ्चालकहरुको निर्वाचन सम्पन्न गरेको छ जसबाट सञ्चालकमा शैलेष संघई र अनिता रायमाझी टण्डन निर्विरोध निर्वाचित भएका छन् । निर्वाचित सञ्चालकहरुलाई निर्वाचन अधिकृतले पद तथा गोपनियताको सपथ ग्रहण समेत गराएका छन् ।