खोलाले कटान गरेर पोल ढाल्दा मेलम्चीमा धर्मराज दुलालले गुमाए ज्यान

७ असार, काठमाडौं । मेलम्ची खोलाले कटान गरेर पोल ढाल्दा सिन्धुपाल्चोकको मेलम्ची नगरपालिका वडा नम्बर ११ का २८ वर्षीय धर्मराज दुलालको घटनास्थलमै मृत्यु भएको छ।

मेलम्चीमा नदीले कटान गरेको ठाउँमा बाँध बनाउने क्रममा करेन्ट लागेर उनको मृत्यु भएपछि स्थानीय वासिन्दाले अहिले विद्युत प्राधिकरणविरुद्ध प्रदर्शन गरेका छन् ।

मेलम्ची नदीको तटीय क्षेत्रमा बाँध बनाउन एक्साभेटर लिन जाने क्रममा विजुलीको तारले छोई करेन्ट लागेर सोमबार बिविहान दुलालको मृत्यु भएको थियो । स्थानीय वासिन्दाले प्राधिकरणको लापरवाहीका कारण मृत्यु भएको भनी प्रदर्शन गरेका छन् ।

प्रहरीका अनुसार अहिले यो बिषयमा स्थानीय वासिन्दा र विद्युत प्राधिकरणका प्रतिनिधिबीच सोमबार छलफल सुरु भएको छ । तर स्थानीयले प्रदर्शन भने जारी राखेका छन् । प्रदर्शनका कारण मेलम्ची क्षेत्रमा सडक बन्द भएको छ ।

यता मेलम्ची नगरपालिका वडा नम्बर १० स्थित बगरमा हिँडिराखेका दुलालको हातमा करेन्ट लागेको स्थानीय बासिन्दाले जनाएका छन्। मेलम्चीले कटान गरेर विद्युतको पोल ढालेको र उनको हातमा ११ हजार भोल्टको करेन्ट लागेको थियो।