बिहीबारबाटै अन्तर्राष्ट्रिय उडान, आन्तरिक असार १७ गतेदेखि हुने

९ असार, काठमाडौं । संस्कृति, पर्यटन तथा नागरिक उड्डयन मन्त्रालयले असार १७ गतेदेखि आन्तरिक हवाई उडान सञ्चालन गर्न आवश्यक तयारी थाल्न नेपाल नागरिक उडड्यन प्राधिकरणलाई पत्राचार गरेको छ। नेपाल नागरिक उड्डयन प्राधिकरणलाई पत्राचार गरेर मन्त्रालयले आवश्यक तयारी थाल्ने भएकाे हाे ।

विभिन्न वायुसेवा कम्पनीहरुलाई दुईतर्फी उडान स्वीकृति प्रदान गर्न र अर्को आदेश जारी नभएसम्म असार १७ बाट कुल उडान संख्याको ५० प्रतिशत नबढ्ने गरी आन्तरिक उडान सञ्चालन गर्ने व्यवस्था मिलाउन मन्त्रालयले प्राधिकरणलाई भनेको छ।

आन्तरिक उडानका लागि तोकिएका गन्तव्यहरुको विवरण स्वास्थ्य तथा जनसंख्या मन्त्रालयको सुझावसमेतको राय प्राप्त भएपछि पत्राचार गरिने पर्यटन मन्त्रालयले प्राधिकरणलाई पठाएको पत्रमा भनिएको छ। सोमबार बसेको मन्त्रिपरिषद्को बैठकले आन्तरिक र अन्तर्राष्ट्रिय उडान सञ्चालनको व्यवस्था मिलाउने जिम्मा संस्कृति, पर्यटन तथा नागरिक उड्डयन मन्त्रालयलाई दिएको थियो।

अन्तर्राष्ट्रिय हवाई उडानतर्फ भने भोलि २४ तारिखदेखि नै उडान भर्ने तालिका मन्त्रालयले जारी गरेको छ । मन्त्रालयले जारी गरेको सूचना अनुसार २४ जुनमा नेपाल एयरलाइन्सले कतारको दोहा र टर्कीस एयरलाइन्सले इस्तानबुलबाट उडान गर्नेछ । २५ जुनमा नेपाल एयरलाइन्सको जहाजले जापानका लगि उडान भर्नेछ । यसै दिन एयर इण्डियाको जहाज दिल्लीबाट काठमाडौं आउनेछ ।

२६ जुनमा कतार एयरवेजको जहाज दोहाबाट काठमाडौं आउनेछ । त्यसै दिन टर्की एयरलाइन्सको जहाज इस्तानबुलबाट काठमाडौं आउने तालिका रहेको छ । यो दिन एयर अरेवियाको जहाज आबुधावीबाट काठमाडौं आउने उडान तालिका सार्वजनिक गरेको छ ।

२७ जुनमा नेपाल एयरलाइन्सले दोहा उडान गर्ने भनिएको छ । उक्त दिन हिमालय एयरलाइन्सले क्वालालाम्पुर र दुबईमा एक÷एक उडान गर्नेछ । त्यसै दिन कतार एयरवेज दोहाबाट काठमाडौं, र जजिरा एयरवेज कुवेतबाट काठमाडौं आउने तालिका रहेको छ ।

२८ जुनमा नेपाल एयरलाइन्स दुबई जाने तालिका रहेको छ । त्यसै दिन हिमालय एयरलाइन्सले साउदीको दमाममा उडान गर्ने भनिएको छ । त्यसै दिन कतार एयरवेजले दोहाबाट उडान गर्ने भएको छ। २९ जुनमा नेपाल एयरलाइन्स दोहा जाने तालिका रहेको भने त्यसै दिन टर्कीबाट टर्किस एयरलाइन्स नेपाल आउने भनिएको छ ।

२९ जुनमै फ्लाई दुबई दुबईबाट काठमाडौं र ओमानबाट सलाम एयरको जहाज काठमाडौं आउनेछ । ३० जुनमा नेपाल एयरलाइन्सले दुबई, हिमालय एयरलाइन्सले दमाम, कतार एयरवेजले दोहा र जजिरा एयरवेजले कुवेतबाट उडान गर्ने गरि तालिका सार्वजनिक भएको छ ।