लाभांश पारित गर्न आरम्भ चौतारी बोलायो एजीएम, बुक क्लोज कहिले ?

६ फागुन, काठमाडौं । आरम्भ चौतारी लघुवित्त वित्तीय संस्थाले साधारणसभा आह्वान गरेको छ । लघुवित्तले चैत २७ गते वार्षिक साधारणसभा बोलाएको छ । सभामा गत वर्षको नाफाबाट २१ प्रतिशत बोनस शेयर वितरण गर्ने प्रस्ताव पेश हुनेछ ।

बोनस वितरणपछि चुक्ता पुँजी वृद्धि हुने भएकोले प्रबन्धपत्र तथा नियमावली संसोधन गर्ने एजेन्डा पनि छ । यसैगरी, अन्य कुनै लघुवित्तसँग मर्जर वा एक्विजिसनमा जानु परेका सम्पूर्ण कामको अख्तियारी सञ्चालक समितिलाई दिइने भएको छ । आर्थिक वर्ष २०७७/७८ को वासलात, नाफा–नोक्सान र नगद प्रवाहमाथि छलफल हुनेछ ।

आर्थिक वर्ष २०७८/७९ का लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा पनि राखिएको छ । सभा बनेपा पार्टी भेन्यु, काभ्रपलाञ्चोेकमा बिहान ११ बजे सुरु हुनेछ ।

सभा प्रयोजनका लागि कम्पनीले चैत १७ गतेदेखि २७ गतेसम्म बुक क्लोज गर्ने भएको छ । तसर्थ, चैत १६ गतेसम्म कायम रहने सेयरधनीले मात्र प्रस्तावित बोनस शेयर पाउनेछन् ।