पहिरोका कारण अवरुद्ध मुग्लिन-नारायणगढ सडकखण्ड सञ्चालनमा

२५ वैशाख चितवन । बाटो माथिबाट पहिरो खसेपछि अवरुद्ध भएको मुग्लिन-नारायणगढ सडकखण्ड सञ्चालनमा आएको छ ।

चितवनको इच्छाकामना गाउँपालिका-६ तोपेखोलामा माथिबाट सुख्खा पहिरो खसेर बाटो अवरुद्ध भएको थियो । पहिरो पन्छाएसँगै अहिले सडक सञ्चालनमा आएको हो । जिल्ला ट्राफिक प्रहरी कार्यालय चितवनले शनिबार पनि उक्त स्थानमा पहिरो खस्दा रातभर बाटो अवरुद्ध भएको जनाएको छ। शनिबार बेलुका ७:४० बजे खसेको पहिरो आइतबार बिहान ४:१५ बजे पन्छाइसकिएको थियो ।

त्यसपछि दुवैतर्फ रोकिएका सवारी सञ्चालनमा आएका थिए। तर, बिहान ४:४८ बजे फेरि पहिरो खसेर दुवैतर्फको बाटो अवरुद्ध भएको थियो । पुन: पहिरो पन्छाएसँगै दुवैतर्फ रोकिएका सवारी साधन सञ्चालनमा आएको प्रहरीले जनाएको छ ।