काठमाडौं महानगरमा साढे १४ हजार मत गणना सकिँदा बालेनको अग्रता कायमै, मतगणनाप्रति जन आक्रोस बढ्दै

२ जेठ, काठमाडौं ।  काठमाडौं महानगरपालिकामा अहिलेसम्म १४ हजार पाँच सय मत गणना भएको छ । मतगणना अति ढिलो भएको भन्दै प्रति निर्वाचन आयोगप्रति आक्रोस पनि बढ्न थालेको छ । काठमाडौं महानगरको एक सातामा आयोगले मतगणना सक्ने जनाएको थियो ।

पछिल्लो परिणाम अनुसार स्वतन्त्र उमेदवार बालेन शाहले ६ हजार ४८६ मत प्राप्त गरेका छन् । उनी नै अहिलेसम्म अग्रस्थानमा रहेका छन् । आफ्नो प्रतिस्पर्धी नै नभएको दावी गर्दै आएका नेकपा एमालेका उमेदवार केशव स्थापितले ३ हजार ४१३ मत प्राप्त गरेका छन् । कांग्रेस उमेदवार सिर्जना सिंहले ३ हजार ९ मत प्राप्त गरेकी छन् ।

जिल्ला मुख्य निर्वाचन अभिकृतलाई मात्रै जिम्मेवारी छोड्दा प्राय सबै ठाउँको मतगणना उस्तै ढिलो रुपमा भइरहेको छ । निर्वाचन आयोगले वैशाख ३० मा भएको स्थानीय तह निर्वाचनपछि मतगणना तयारीलाई व्यवस्थित र छिटोछरितो गर्न नसक्दा गणना कछुवा गतिमा भइरहेको हो ।

२०७४ सालको स्थानीय निर्वाचनमा सबैभन्दा धेरै मतदाता भएको काठमाडौं महानगरपालिकाको मत गन्न १४ दिन लागेको थियो । निर्वाचन सकिए लगत्तै आयोगका प्रमुख निर्वाचन आयुक्त दिनेशकुमार थपलियाले जेठ ५ गतेभित्र देशभरको नतिजा आइसक्ने घोषणा गरेका थिए ।

काठमाडौं महानगरका ३२ वटा वडामा ३ सय ६३ मतदान केन्द्र थिए । आयोगका अनुसार महानगरपालिकामा ६३ प्रतिशत मतदान भएको छ । ललितपुर महानगरपालिकामा २० वटा वडा छन् । त्यसमध्ये दोस्रो दिन बल्ल चारवटा वडाको बाकस खोलेर गणना गर्न थालिएको छ । ललितपुर महानगरमा ८५ हजार मत खसेको छ ।