देउवा समुहको एकलौटीविरुद्ध शेखर कोइराला पक्षले आज खबरदारी सभा गर्दै

८ असोज, काठमाडौं । समानुपातिक उम्मेदवारको बन्द सूचीमा सभापति शेरबहादुर देउवा समूहले एकलौटी गरेको भन्दै इतर समूह प्रतिकारमा उत्रिने निर्णय गरेको छ । सभापति देउवाका कारण सत्तारुढ दल नेपाली कांग्रेसमा असन्तुष्टि बढेको छ ।

१४ औं महाधिवेशनका सभापतिका प्रत्यासी डा. शेखर कोइराला समूहले सभापति देउवाले एकलौटी गरेको विरोधमा शनिबार खबरदारी सभाको आयोजना गरेको छ ।
शेखर समूहले शनिबार बानेश्वर ब्यांक्वेटमा दिउँसो १ बजेलाई खबरदारी भेला बोलाएको छ खबरदारीसभा थापागाउँस्थित बानेश्वर ब्याक्वेटमा तय भएको छ ।

आज दिउँसो १ बजे राखिएको खबरदारीसभामा पार्टीका भातृ संगठन र शुभेच्छुक संस्थालाई पनि निम्ता गरिएको छ । सभामा केन्द्रीय तथा जिल्लाका नेतासहित कोइराला पक्षका जिल्ला सभापतिहरुसमेत उपस्थित रहने बताएको छ । निर्वाचन आयोगमा बुझाइएको समानुपातिक सूचीमा एकलौटी गरेको भन्दै सत्तारुढ दल नेपाली कांग्रेसमा असन्तुष्टि चुलिदै गएको छ ।

सत्ता गठबन्धन दलबीच सीट बाँडफाँटमा सहमति नभएका बेला कांग्रेसभित्र भने दुई समूहबीच नै समस्या देखिएको छ । शेखर समूहले आगामी चुनावका लागि प्रतिनिधिसभा र प्रदेशसभामा कम्तिमा ४० प्रतिशत सिट आफ्नो पक्षका नेतालाई दिन माग गरिरहेको छ ।

शेखर समूहले पटकपटक भेला र बैठक गरेर सभापति शेरबहादुर देउवालाई दबाब दिंदै आएको छ । साथै आफूहरूलाई न्यायोचित व्यवहार नगरिए गठबन्धनमा समेत समस्या आउने शेखर समूहले चेतावनी दिइरहेको छ ।

कांग्रेसले प्रत्यक्षतर्फ उम्मेदवार चयन गर्नेबारे भने छलफल गरिसकेको छैन । सत्ता गठबन्धनसँग मिलेर कांग्रेस मंसिर ४ मा हुने प्रतिनिधिसभा र प्रदेशसभा चुनावमा जाने निर्णय गरेको थियो । कांग्रेसले प्रत्यक्षतर्फ कति सिटमा उम्मेदवारी दिने भन्ने पनि टुंगो लागेको छैन।

याे पनि :   

  कोइराला समूहको खबरदारीसभा बानेश्वर ब्याक्वेटमा तय, भातृ र शुभेच्छुक संस्थालाई पनि निम्तो