धनगढीमा आन्दोलित विद्यार्थीमाथि दमन, ८ राउण्ड हवाई फायर

१६, मंसिर, धनगढी । कालिका कन्ट्रक्सनको ग्रेडरले किचेर छात्रा चेतना साउदको मृत्यु घटनाको विरोधमा आन्दोलित विद्यार्थीमाथि प्रहरीले चर्को दमन गरेको छ ।

आन्दोलन चकिँदै गएपछि जिल्ला प्रशासन कार्यालयले यहाँस्थित सीमाना तोकेर जारी गरेको निषेधाज्ञा क्षेत्र आसपास विद्यार्थीहरूले प्रदर्शन आज पनि जारी राखेपछि प्रहरीले दर्जन भन्दा बढी अश्रुग्यास र ८राउण्ड हवाइ फायर गरेको छ ।

यसपछि यहाँको अवस्था झनै तनावग्रस्त बनेको छ । प्रहरीले किशोर किशोरी विद्यार्थीमाथिथ धरपकड, दमन र लछारपछार गरी गिरफ्तार गरेर ज्यादाति गरेपछि आन्दोलन उग्र बनेको छ ।

ग्रेडरको ठक्करबाट साथीको ज्यान गएपछि पञ्चोदय माध्यमिक विद्यालयका सयौं विद्यार्थी आन्दोलन भएका छन् । गिरफ्तार गरिएका विद्यार्थीले प्रहरीको भ्यानभित्रै चर्को नाराबाजी गरेका छन् । दर्जनको संख्यामा छात्रछात्रा गिरफ्तार परेका छन् ।

मृतक चेतना कक्षा ८ मा अध्ययनरत थिइन् । आन्दोलनले चर्को लिन सक्ने भन्दै प्रशासनले बिहीबार साँझ ७ बजेदेखि अर्को सूचना जारी नभएसम्मका लागि निषेधाज्ञा जारी गरेको छ ।

बिहीबार बिहान साइकल चढेर विद्यालय जाँदै गरेकी चेतनालाई ग्रेडरले ठक्कर दिँदा घटनास्थलमै मृत्यु भएको थियो । पीडित पक्षले भने कम गतिमा रहेको ग्रेडरले घाइते चेतनालाई ब्याक गरी हत्या गरेको दाबी गरेका छन् ।

उनीहरूले हत्याका दाेषीलाइ कारबाही गर्न र पीडतलाइ न्याय दिन माग गरेका छन् ।