धार्मिक पर्यटनको प्रर्बद्धन गर्न तिलिचो तालसम्म बोलबम यात्रा

स्याङ्जा । एकदशक भन्दा अगाडि देखि वालिङ बोलबम समितिले शान्तिका लागि बोलबम यात्रा शुभारम्भ गर्दै आएको छ । हरेक श्रावण महिनामा नेपालका विभिन्न धार्मिक स्थलमा पुगेर कालीगण्डकीको जल चढाउदै आएको बोलबम समिति यो पटक भने धार्मिक प्रर्बद्धनका लागि मनाङ्को तिलिचो ताल पुग्ने भएको छ ।

सरकारले बर्ष २०२० लाई पर्यटन बर्षका रुपमा मनाउने घोषणा गरेसँगै वालिङ बोलबम समितिले यो पटक धार्मिक पर्यटन प्रर्बद्धन गर्ने उदेश्यले धार्मिक यात्रा तय गरेको बोलबम समितिका अध्यक्ष दिपेन्द्र तिवारीले जानकारी दिए । श्रावण १९ गते देखि शुरु हुने यात्रा नेपालकै अग्लो ताल तिलिचो पुग्ने छ । तिवारीका अनुसार तनहुँको इशानेश्वर महादेव मन्दिरमा कालीगण्डकीको जल चढाएर पर्यटन प्रबद्र्धन गर्ने उदेश्यले तिलिचो ताल हेरेर समिति फर्कने बताए ।

हरेक बर्ष शान्तिका लागि बोलबम भन्ने नारा तय गरेर धार्मिक क्षेत्रको दर्शन गर्ने गरेका थियौं, समितिका अध्यक्ष तिवारीले भने,“ यो पटकको हाम्रो यात्रा शान्तिसँगै पर्यटन प्रर्बद्धनलाई जोड दिएका छौं ।” सरकारले २०२० को पर्यटन बर्ष घोषणालाई हाम्रो धार्मिक यात्राले पनि सघाउ पुग्ने विश्वास लिएको तिवारीले बताए ।

समितिले यात्राको समय तालिका समेत सार्वजनिक गरेको छ । १९ गतेदेखि यात्रा शुरु गरेर २० गते तनहुँको इशानेश्वर महादेव मन्दिरको दर्शन गरि बेशीशहरमा बास बस्ने, बेशी शहरबाट मनाङ्को खाङ्सारमा बास बस्ने र २२ गते बेस क्याम्पमा पुगेर बास बस्ने गरी २३ गते तिलिचो ताल पुग्ने समय तालिका सार्वजनिक गरेको यात्रा संयोजक युवराज गौतमले जानकारी दिए । यात्रामा कुनै कठिनाई नआउने गरी सबै व्यवस्थापन मिलाएको गौतमले जानकारी दिए ।

स्याङ्जाका धार्मिक स्थलहरुको प्रचार प्रसार र धार्मिक पर्यटन प्रर्बद्धन हुने विश्वासका साथ वालिङ बोलबम समितिले आयोजना गरेको बोलबम यात्रालाई छुट्टै तवरले हेरिएको छ । एउटै पोषाकमा करिब ८० जना बोलबम युवाहरुको सहभागिता हुने समितिका सचिव अशोक तिवारीले जानकारी दिए ।

२०६१ सालबाट बोलबम समितिले हरेक श्रावण महिनामा मुलुकका हरेक धार्मिक स्थल पुग्दै आएका छन् । मुक्तिनाथधामबाट पहिलो यात्रा शुरु गरेको समितिको यो १४ औं संस्करणको यात्रा हो ।