दिव्या सिंहलाई हटाएर वरिष्ठताका आधारमा आईओएमको डीन नियुक्त गर्न नेविसंघको माग

१० असार, काठमाडौं । प्रमुख प्रतिपक्षी दल नेपाली कांग्रेसको भ्रातृ संगठन नेपाल विद्यार्थी संघले चिकित्साशास्त्र अध्ययन संस्थान आईओएमको डीन वरिष्ठताका आधारमा नियुक्त गर्न माग गरेको छ । नेविसंघले बुधबार एक प्रेस विज्ञप्ती निकालेर वरिष्ठताका आधारमा आईओएममा डीन नियुक्त गर्न माग गरेको हो । सरकारले आईओएममा प्रधानमन्त्री ओलीका चिकित्सक दिव्यासिंह शाहलाई नियुक्त गरिसकेको छ ।

दिव्या कनिष्ठ रहेको र आईओएमको शाख जोगाउन वरिष्ठताका आधारमा डीन नियुक्त गर्नुपर्ने डा. गोविन्द केसीको मर्मलाई समेत आत्मसात गर्न नेविसंघले माग गरेको छ । नेविसंघका अध्यक्ष राजीव ढुंगानाले आफ्नो ज्यान हत्केलामा राखेर आईओएमको शाख जोगाएका डा.केसीको त्याग र योगदानलाई सम्मान गर्न पनि सरकारलाई भनेका छन् ।

साथै नेविसंघले पोखरा विश्वविद्यालय, नेपाल संस्कृत विश्वविद्यालयमा तत्काल पदाधिकारी नियुक्त गर्न, त्रिभुवन विश्वविद्यालयमा राजनीतिक भागबण्डा बन्द गर्न, पूर्वाञ्चल विश्वविद्यालयमा मौका परीक्षाको व्यवस्था गर्न, कुनै पनि विद्यालय तथा विश्वविद्यालयमा शुल्क नउठाउन नेविसंघले माग गरेको छ ।

पोखरा विश्वविद्यालय, नेपाल संस्कृत विश्वविद्यालय र कृषि तथा वन विश्वविद्यालयमा ९ महिनादेखि रिक्त पदाधिकारी नियुक्तीका लागि विद्यार्थीले दिएको दबाबलाई सम्बोधन गर्न नेविसंघको माग छ । साथै नेविसंघले राजनीतिक आस्थाका आधारमा त्रिवि लगायतका विश्वविद्यालयमा गरिएको नियुक्ती सच्याउन पनि माग गरेको छ ।