शिक्षक लाइसेन्स परीक्षामा ५ प्रतिशत मात्रै उत्तीर्ण

११ असार, काठमाडौं । प्राथमिक तहको स्थायी शिक्षण अनुमतिपत्रको परीक्षामा सहभागिमध्ये अधिकांश अनुतीर्ण भएका छन । परीक्षामा सहभागि भएका ६६ हजार ५६२ मध्ये ६२ हजार ८८० जना अनुत्तीर्ण भएका शिक्षक सेवा आयोगले जनाएको छ ।

उत्तीर्ण भएका ५ दशमलव ८३ प्रतिशतमध्ये प्रदेश २ र कर्णाली प्रदेशमा त उत्तीर्ण दर ३ प्रतिशत हाराहारी मात्र छ । प्रदेश २ मा १० हजार ६८९ मध्ये ३४९ र कर्णालीमा १२ हजार ७० मध्ये ३७० जना मात्रै उत्तीर्ण भए ।

संघीय राजधानी रहेको वाग्मती प्रदेशमा पनि करिब ८ प्रतिशतले मात्रै शिक्षक लाइसेन्स परीक्षा उत्तीर्ण गरेका छन् । निम्न माध्यमिक र माध्यमिक तहको अवस्था पनि योभन्दा फरक छैन । निमावि शिक्षक अनुमतिपत्रको परीक्षामा सहभागी एक लाख एक हजार ९८४ मध्ये पाँच हजार ७०८ अर्थात ५ दशमलव ६ प्रतिशत मात्र उत्तीर्ण भएका छन ।

यस्तै मावि शिक्षक लाइसेन्सतर्फ ५६ हजार २५७ मध्ये आठहजार ३८८ जना उत्तीर्ण भएका छन । सामान्यतः अंग्रेजी, गणित र विज्ञानमा धेरै विद्यार्थी अनुत्तीर्ण हुन्छन् । शिक्षक अनुमतिपत्रको परीक्षामा भने धेरैजसो सामाजिक शिक्षामा कमजोर देखिएका छन् ।