वकिलसँग मिलेर ५० हजार घुस लिने प्रहरी इन्सपेक्टर अख्तियारको फन्दामा

११ असार, काठमाडौँ । कैलालीमा घुस लिने प्रहरी र कानुन व्यवसायी पक्राउ परेका छन । जिल्ला प्रहरी कार्यालय कैलालीमा कार्यरत प्रहरी निरीक्षक र कानुन व्यवसायी ५० हजार घुससहित पक्राउ परेका हुन ।

अख्तियार दुरुपयोग अनुसन्धान आयोगको कञ्चनपुर कार्यालयले जिल्ला प्रहरी कार्यालय कैलालीमा कार्यरत प्रहरी निरिक्षक प्रकाशसिंह कार्की र कानुन व्यवसायी हिमालय विक्रम विष्टलाई पक्राउ गरेको जानकारी दिएको छ।

अख्तियारको कञ्चनपुर कार्यालयका सूचना अधिकारी टोपबहादुर विष्टले विशेष सूचनाका आधारमा उनीहरुलाई पक्राउ गरिएको बताए। अख्तियारले कानुन व्यवसायी विष्टको कार्यालयमा छापा हानेको थियो। सोही क्रममा दुवै जनालाई ५० हजार घुस सहित रंगेहात पक्राउ गरिएको बिष्टको भनाइ छ। पक्राउ परेका दुबैमाथि थप अनुसन्धान भइरहेको अख्तियारले जनाएको छ ।