प्रचण्डका घरबेटी कालोसूचीमा !

२० भदौ, काठमाडाैं । मलको ठेक्का लिएर भदौसम्म पनि मल नल्याउने नेकपाका अध्यक्ष प्रचण्डका घरबेटी शारदाप्रसाद अधिकारीको कम्पनी शैलुङ कस्ट्रक्सन कम्पनी कालोसूचीमा पर्ने भएको छ ।

मल ल्याउने सहमति गरेर किसानसमक्ष नपुर्‍याउने दुईवटा ठेकदार कम्पनीको ५/५ करोड रुपैयाँ धरौटी सरकारले जफत गरेसँगै दुवै कम्पनी कालोसूचीमा पर्ने भएका हुन् । यी दुवै कम्पनीलाई कालोसूचीमा राख्नका लागि कृषि मन्त्रालयले सिफारिस गरेको छ ।

आइतबार कृषि सामग्री संस्थानको बैठक बसेर दुबै ठेकदारको धरौटी जफत गर्न लागिएको हो । संस्थानले गत पुसमा वर्षायामको मल आपूर्तिका लागि शारदाप्रसाद अधिकारीको शैलुङ कस्ट्रक्सन कम्पनी र होमनाथ कोइरालाको होविको मल्टीपल कम्पनीलाई मल आपूर्तिको ठेक्का दिने निर्णय गरेको थियो ।

अधिकारी प्रचण्डका घरबेटी भएपनि होमनाथ कोइराला नेपाली कांग्रेस निकट ठेकदार हुन् । उनीहरुले मल आपूर्ति गर्नुपर्ने अन्तिम ‘डेटलाइन’ सकिइसकेको तर अहिलेसम्म आपूर्ति गर्न नसकेका कारण दुबै कम्पनीलाई कारवाही गर्न लागिएको हो ।

मलको आपूर्ति र वितरण दुबैमा गडबडी हुने गरेको निश्कर्ष निकाल्दै कृषि मन्त्रालयले दुबै ठेकदारलाई कारवाही गरी धरौटी जफत गर्ने र कालो सूचीमा राख्ने निर्णय गर्न लागेको हो ।