शिवको चिन्ता : संगीतमा विषादी मिसाउन थालियो !

२९ असोज, काठमाडौं । पछिल्लो समय पैसाको बलमा संगीतमा नयाँ नयाँ प्रयोग गर्ने चलन बढ्दो छ । अझ त्यसमा पनि थोरै लगानी गरेर, छाडा शब्द राखेर बढी चर्चा कमाउने होडबाजी छ । युट्युबमा भ्युज कमाउने लोभमा जे मन लाग्यो त्यस्तै शब्द प्रयोग गर्ने चलन भन् बढ्दो छ ।

संगीतमा खासै ध्यान नदिने र सर्जक भ्युजको मात्रै चिन्ता गर्ने प्रवृत्ति मौलाएको छ । हरेक दिन सार्वजनिक हुने गीतसंगीतमा मिठास हराएका छन् । प्रतिस्पर्धा र व्यापार मात्र फस्टाएको छ । युटुबमा भ्यूज र ट्रेन्डिङमा आएपछि २ दिन सामाजिक संजालमा रमाउनु बाहेक कुनै सर्जकले संगीत सिर्जना गरेर के उपलब्धी गर्यो भन्न सकिने अवस्था छैन ।

यही प्रवृत्तिप्रति गायक तथा संगीतकार शिव परियारले चिन्ता व्यक्त गरेका छन् । जसरी तरकारीमा विषादी हालेर छिटो पकाउने गरिएको छ । त्यसरी नै संगीतलाई नै विषादी हालेर प्रदुषण गर्ने गरेकामा उनले चिन्ता व्यक्त गरेका छन् । तर यो स्वस्थ्य र राम्रो नहुने उनको भनाई छ ।

‘संगीत भनेको अन्न बाली जस्तै लाग्न थालेको छ हिजोआज । जसरी सही हावा, पानी र वातावरण पाउँदा अन्न बाली सप्रिन्छ, नपाउँदा विग्रन्छ । त्यस्तैगरि संगीत पनि फुल्न सही हावा पानी र वातावरण चाहिने रहेछ । अन्न बाली रोप्न माटो, हावा, पानी र वातावरण चाहिए जस्तै संगीत रोप्न पनि श्रोताहरुको मिल्दो मन, भावना र मस्तिष्क चाहिने रहेछ । यसरी पाकेको संगीत संगीत जगतकै लागि के स्वस्थकर होला त ?’ शिवले फेसबुकमा प्रश्न गरेका छन् ।