शेयरबजारमा डिम्याट खाताको संख्या ३१ लाख नाघ्यो, यस्तो छ डिम्याटको महत्व ?

२५ फागुन, काठमाडौं । कुनै पनि कम्पनीको प्राथमिक शेयर बजारमा सार्वजनिक निष्कासनमा आएको शेयर खरिद गर्न होस या दोस्रो बजारमा कारोबार गर्न डिम्याट खाता अनिवार्य रहेको छ ।

अहिले डिम्याट खाताको संख्या करिब ३१ लाख पुगेको सीडीएस एण्ड क्लियरिंगको तथ्यांकले देखाएको छ । सिडिएस एण्ड क्लियरिङ लिमिटेडले दिएको जानकारी अनुसार हालसम्म डिम्याट खाताको संख्या ३० लाख ९५ हजार ५९२ पुगेको हो ।

पछिल्लो समय नेपाल पूर्वाधार बैंकको प्राथमिक शेयरको निष्कासनका बेलामा सर्वसाधरणको शेयर प्रति आकर्षण बढेसंगै डिम्याट खाता खोल्नेको संख्या पनि ह्वात्तै बढेको हो । सिडिएससीका अनुसार गत साउन मसान्तसम्म डिम्याट खाताको संख्या १८ लाख ५ हजार ६०७ रहेको थियो । साउन महिना यता करिब १३ लाख हितग्राही खाता खोलिएको छ ।

करिब ३१ लाखको संख्यामा डिम्याट खाता खोलिए पनि नेप्सेको तथ्यांक अनुसार दोस्रो बजारमा ६ लाखभन्दा बढी र सिडिएससीका अनुसार प्राथमिक बजारमा करिब १६ लाख लगानीकर्ता सहभागी भएका छन् । पछिल्लो पटक सार्वजनिक निष्कासनमा आएको महिला लघुवित्तको आईपीओमा करिब १५ लाख ८० हजारभन्दा बढीले आवेदन दिएका थिए ।

कसरी खोल्ने डिम्याट खाता ?

यो खाता विभिन्न बैंकका सहायक कम्पनीहरुमा खोल्न सकिन्छ । सहायक कम्पनी भएका बैंकहरुले नै यस्तो खाता खोलिदिन्छन् । ब्रोकर कम्पनीहरुमार्फत पनि यस्तो खाता खोल्न सकिन्छ । यो खाता खोलिदिने संस्थालाई निक्षेप सदस्य (डिपोजिटरी पार्टिसिपेन्ट) भनिन्छ ।

७६ वटा यस्ता निक्षेप सदस्य छन् । यस्तो खाता खोल्नका लागि बैंक खाता नम्वर, नागरिकता प्रमाणपत्रको फोटोकपी र फोटो चाहिन्छ । आफूले कारोबार गर्ने बैंक वा ब्रोकर कम्पनीमै यस्तो खाता खोल्न सकिन्छ ।