पत्रकार चन्द्रकलालाई कोभिड बीमावापतको रकम हस्तान्तरण

२९ बैशाख, काठमाडौं । मिसन मिडिया क्लबले नेपाल पत्रकार महासंघ भक्तपुरका कोभिड संक्रमित पत्रकार चन्द्रकला क्षेत्री भगवतीलाई कोभिड बीमावापतको रकम हस्तान्तरण गरेको छ ।

यसअघि क्लबले संक्रमित पत्रकारलाई जनही एकलाख रुपैया उपलब्ध गराउँदै आएकोमा यसपटक कोभिड–१९ दोस्रो लहरको उच्च जोखिमका कारण नेपाल पत्रकार महासंघ उपत्यका प्रदेश समितिको बैठकको निर्णय अनुसार समितिले स्थापना गरेको कोभिड पत्रकार राहत कोष प्रयोजनका लागि क्लबको तर्फबाट बीमित पत्रकारसँग दश हजार कट्टी गर्दै बीमा रकम हस्तान्तरण गरेको हो ।

क्लबका अध्यक्ष एवम् प्रदेश समितिका तत्कालीन महासचिव श्रीजन झाको अगुवाइमा महासंघ उपत्यका प्रदेश समिति आबद्ध प्रदेश मातहतका काठमाडौ, भक्तपुर र ललितपुर जिल्लाका ११९ पत्रकारको पत्रकार कोभिड बीमा गरेको थियो ।

नेपाल पत्रकार महासंघ उपत्यका प्रदेश समितिका अध्यक्ष श्रीजन झाले फोटो पत्रकार चन्द्रकलालाई हिजो २८ गते उपत्यका प्रदेश समितिको कार्यकक्षमा बीमावापतको चेक हस्तान्तरण गरेका छन् ।

चेक हस्तान्तरण कार्यक्रममा प्रदेश समितिका अध्यक्ष झाले आफुले पाउने बीमावापतको रकम मध्ये दशहजार राहत कोषमा योगदान गर्नुभएकोमा हार्दिक आभार व्यक्त गर्दै उहाँको सुस्वास्थ्यको कामना गरेका थिए । कार्यक्रममा प्रदेश समितिका सचिव रोशनराज पाण्डे फोटो पत्रकार अनुप प्रधान लगायतको उपस्थिति रहेको थियो ।