देउवा भन्छन्, विधिको शासनलाई सर्वाेच्चले स्थापित गरिदियो !

२८ असार, काठमाडौं । नेपाली कांग्रेसका सभापति शेरबहादुर देउवाले सर्वोच्च अदालतले गरेको फैसलाको स्वागत गरेका छन् । उनले सर्वोच्च अदालतले विधिको शासन बचाउदै ऐतिहासिक फैसला गरेको बताएका हुन् ।

संसद विघटनलाई बदर गरेको सर्वोच्चले देउवालाई भोलि साँझ ५ बजेसम्म प्रधानमन्त्री नियुक्त गर्न परमादेश दिएको छ । सञ्चारकर्मीहरुलाई संक्षित प्रतिक्रिया दिएका देउवाले ‘निष्पक्ष र धम्कीसँग नडराउने अदालतले लोकतन्त्र, न्याय र विधिको शासनलाई बचाएको उल्लेख गरेका छन् ।

सरकार गठनबारे सोधिएको प्रश्नमा उनले गठबन्धनमा आबद्ध दलहरुसँग छलफल गर्ने जानकारी दिएका छन् । सोमबार सर्वोच्च अदालतले प्रतिनिधिसभा पुनःस्थापना गर्दै मंगलबार साँझ ५ बजेसम्म प्रधानमन्त्रीमा देउवालाई नियुक्त गर्न परमादेश जारी गरेको छ । सर्वोच्चको फैसलापछि  विपक्षी गठबन्धनको बैठक बस्ने तयारी भइरहेकाे छ ।