काठमाडौंमा डुबानमा परेकाहरूको सशस्त्र प्रहरीद्वारा उद्वार

२१ भदौ, काठमाडौं । अविरल वर्षाका कारण भक्तपुर जिल्लाको चाँगुनारायण नगरपालिका-४ इन्जिनियरिङ कलेज नजिक मनहरा खोलाको पानी सुकुम्बासी बस्तीमा पसेर डुबानमा परेका ७० घरपरिवारको सशस्त्र प्रहरीले सकशुल उद्वार गरेको छ ।

घटनाबारे जानकारी पाउनासाथ सशस्त्र प्रहरी बल नेपाल नम्बर २२ गण भक्तपुरबाट खटिएको सशस्त्र प्रहरीको टोली उनीहरूको उद्धार कार्यमा जुटेको थियो ।

यसैगरी काठमाडौं महानगरपालिका-८ गौरीघाटस्थित सुकुम्बासी बस्तीमा बाग्मती नदीको बहाव बढेर डुबानमा परेका १०० घरपरिवारको पनि सशस्त्र प्रहरीले उद्वार गरेको छ । घटनाबारे जानकारी पाउनासाथ सशस्त्र प्रहरी बल नेपाल नम्बर २० गण उपत्यकाबाट खटिएको सशस्त्र प्रहरी उनीहरूको उद्धार कार्यमा जुटेको थियो ।

यता, काठमाडौं महानगरपालिका-११ थापाथलीस्थित सुकुम्बासी बस्तीमा बाग्मती नदीमा पानीको बहाव बढेर बस्तीमा पसेपछि डुबानमा परेकाहरूको पनि सशस्त्र प्रहरी बल नेपाल नम्बर २० गण काठमाडौंबाट खटिएको सशस्त्र प्रहरी टोलीले सकुशल उद्वार गरेको छ ।

यसैगरी काठमाडौं महानगरपालिका-१३ कालीमाटीस्थित बाग्मती र विष्णुमती नदीको दोभानमा रहेको सुकुम्बासी बस्तीमा पानी पसेर डुबानमा परेका घरपरिवारको पनि सशस्त्र प्रहरी बल नेपाल नम्बर १८ गण काठमाडौंबाट खटिएको सशस्त्र प्रहरीले उद्धार गरेको सशस्त्र प्रहरीले जानकारी दिएको छ ।

काठमाडौं महानगरपालिका-१४ बल्खुस्थित बाग्मती नदीमा पानीको बहाव बढेर सुकुम्बासी बस्तीमा पस्दा डुबानमा परेका ६० घरपरिवारको सशस्त्र प्रहरी बल नेपाल नम्बर १८ गण काठमाडौंबाट खटिएको सशस्त्र प्रहरीले उद्धार गरेको छ भने सशस्त्र प्रहरी बल नेपाल नम्बर २० गण उपत्यकाबाट खटिएको सशस्त्र प्रहरी टोलीले काठमाडौं जिल्लाको कागेश्वरी मनोहरा नगरपालिका-७ हरहरमहादेवस्थित सुकुम्बासी बस्तीमा पानी पसेर डुबानमा परेका घरपरिवारका सामान तथा चौपाया सुरक्षित स्थानमा सारेको सशस्त्र पर्हरीद्वारा जारी विज्ञप्तिमा जनाइएको छ ।