खराब कर्जा उठाउन सफल भएसँगै मिथिला लघुवित्तको मुनाफा बढ्यो

२३ कार्तिक, काठमाडौं । मिथिला लघुवित्त वित्तीय संस्था लिमिटेडले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार लघुवित्तको मुनाफा गत आर्थिक वर्षको सोही अवधिको तुलनामा बढेको छ।

असोज मसान्तसम्ममा लघुवित्तले १ करोड ९९ लाख रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा २६.३१ प्रतिशत बढी हो। गत आर्थिक वर्षको सोही अवधिसम्ममा लघुवित्तले १ करोड ५७ लाख रुपैयाँ मात्र मुनाफा कमाएको थियो।

ब्याज आम्दानी र खराब कर्जा उठाउन सफल भएपछि लघुवित्तको मुनाफा बढेको हो।

समीक्षा अवधिमा लघुवित्तको खुद ब्याज आम्दानी ३०.२५ प्रतिशत बढेर ३ करोड ३३ लाख पुगेको छ । त्यस्तै, कम्पनीको सञ्चालन मुनाफा ९.९० प्रतिशत बढेर २ करोड ३७ लाख पुगेको छ ।  लघुवित्तले सो अवधिसम्ममा सम्भावित जोखिम बापतको व्यवस्थामा ३० लाख ७२ हजार रुपैयाँ छुट्याएको छ भने सो अवधिमा ७५ लाख ७१ हजार रुपैयाँ खराब कर्जा उठाउन सफल भएको छ।

समीक्षा अवधिमा लघुवित्तको चुक्ता पूँजी १२ प्रतिशत बढेर १३ करोड ६३ लाख रुपैयाँ पुगेको छ भने जगेडा कोष ७७।४० प्रतिशत बढेर १५ करोड रुपैयाँ पुगेको छ । त्यसैगरी, लघुवित्तको सापटी समीक्षा अवधिमा १८.१५ प्रतिशत बढेर १ अर्ब ८ करोड पुगेको छ भने निक्षेप ३२.१४ प्रतिशतले बढेर ५४ करोड ३९ लाख र कर्जा २६।७५ प्रतिशत बढेर १ अर्ब ८४ करोड पुगेको छ ।

लघुवित्तको प्रतिशेयर आम्दानी पनि बढेको छ। गत आर्थिक वर्षको असोज मसान्तसम्ममा ५१ रुपैयाँ ७९ पैसा रहेको लघुवित्तको यस्तो आम्दानी चालु आर्थिक वर्षको सोही अवधिसम्ममा ५८ रुपैयाँ ४१ पैसा पुगेको छ। असोज मसान्तसम्ममा, लघुवित्तको मूल्य आम्दानी अनुपात ३४।७९ गुणा रहेको छ भने प्रतिशेयर नेटवर्थ २१० रुपैयाँ ३ पैसा रहेको छ।