आँधीखोलाको मुनाफासँगै प्रतिशेयर आम्दानी पनि बढ्यो

२४ कार्तिक, काठमाडौं । आँधीखोला लघुवित्तले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार लघुवित्तको मुनाफा गत आर्थिक वर्षको सोही अवधिको तुलनामा बढेको छ।

चालु आर्थिक वर्षको असोज मसान्तसम्ममा लघुवित्तले ९३ लाख ४४ हजार रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा ४१.४५ प्रतिशत बढी हो। गत आर्थिक वर्षको सोही अवधिसम्ममा लघुवित्तले ६६ लाख ६ हजार रुपैयाँ खुद नाफा कमाएको थियो।

असोज मसान्तसम्ममा लघुवित्तको ब्याज आम्दानी १८.३० प्रतिशत बढेर १ करोड ८१ लाख पुगेको छ । त्यस्तै, सञ्चालन आम्दानी १९.४८ प्रतिशत बढेर २ करोड ४२ लाख पुगेको छ। त्यसैगरी, लघुवित्तको सञ्चालन मुनाफा ५.५३ प्रतिशतले बढेर ९६ लाख १४ बजार पुगेको छ । सम्भावित जोखिमबापतको व्यवस्थामा २६ लाख ८६ हजार रुपैयाँ छुट्याएका कारण लघुवित्तको सञ्चालन मुनाफा वृद्धिदर घटेको हो।

लघुवित्तको चुक्ता पूँजी १० करोड रहेको छ । जगेडा कोष ६६.२४ प्रतिशत बढेर ७ करोड ८७ लाख पुगेको छ। त्यसैगरी, लघुवित्तको सापटी समीक्षा अवधिमा ४८.१६ प्रतिशत बढेको छ भने निक्षेप २९.२९ प्रतिशत र कर्जा ३८.६६ प्रतिशत बढेको छ।

असोज मसान्तसम्ममा २६ रुपैयाँ ४२ पैसा रहेको लघुवित्तको यस्तो आम्दानी चालु आर्थिक वर्षको सोही अवधिसम्ममा बढेर ३७ रुपैयाँ ३८ पैसा पुगेको छ। असोज मसान्तसम्ममा, लघुवित्तको मूल्य आम्दानी अनुपात १२.४४ गुणा रहेको छ भने प्रतिशेयर नेटवर्थ १७८ रुपैयाँ ७९ पैसा रहेको छ।