नजिकैको वनमा भीषण आगलागीपछि लुक्ला विमानस्थल बन्द

२३ फागुन सोलुखुम्बु । सोलुखुम्बुको तेन्जिङ हिल्लारी विमानस्थल लुक्ला नजिकैको वनमा भीषण आगलागी भइरहेको छ ।

लुक्ला नजिकैको नक्चुङ भन्ने ठाउँको वनमा लागेको आगोको धुवाँका कारण आज बिहान करिब १ घण्टा विमानस्थल नै बन्द भएको नागरिक उड्डयन प्राधिकरण लुक्लाले जनाएको छ । विमानस्थल नजिकैको जङ्गलमा लागेको आगोको धुवाँले धावन मार्ग नै ढाकेपछि विमानस्थल बन्द गरिएको प्राधिकरण प्रमुख द्वारिका अछामीले बताए ।

अहिले हावाका कारण धुवाँ अन्यत्र बहिरहेकाले उडान भइरहेको उनले बताए। खुम्बु पासाङ ल्हामु गाउँपालिका २ को नाक्चुङमा रहेको जङ्गलबाट गएरातिदेखि सुरु भएको आगो फैलिँदै गएको तारा एयर लुक्लाका स्टेसन इञ्चार्ज अमृत मगरले जानकारी दिए ।