जीत निश्चित नभएका नेताहरु एकभन्दा बढी क्षेत्रबाट सिफारिस, आफ्नै क्षेत्रमा दाहाल र देउवालाई सकस

२९ भदौ, काठमाडौं । आगामी निर्वाचनमा प्रदेश र प्रतिनिधिसभा सदस्यको उम्मेदवार बन्न शीर्ष र नाम चलेका केही नेताहरुको नाम पाँचभन्दा बढी क्षेत्रबाट सिफारिस भएको छ । कतिपयले निर्वाचन क्षेत्रनै फेर्न चाहेका छन् भने कतिपयले हार्ने डरले सुरक्षित क्षेत्र खोज्दै गर्दा बढी ठाँबाट नाम सिफारिस गर्न लगाएका छन् ।

पटक पटक निर्वाचन क्षेत्र फेर्न बानीपरेका जनता समाजवादी पार्टीका अध्यक्ष उपेन्द्र यादवको नाम सबैभन्दा बढी ६ वटा क्षेत्रबाट सिफारिस भएको छ । उनी प्राय एकै ठाँउबाट कम मात्रै चुनाव लड्दै आएका छन् । जसपा अध्यक्ष यादव ०७४ मा सप्तरी–२ बाट निर्वाचित भएका थिए । यसपटक पनि उनी त्यहीँबाट सर्वसम्मत उम्मेदवारका रूपमा सिफारिस भएका छन् । तर, मोरङ–५, बारा–२, पर्सा–४, सिरहा–१ र २ बाट समेत उनको नाम सिफारिस भएको छ ।

पहिलो संविधानसभा चुनावमा उनी मोरङ–५ र सुनसरी–५ बाट उठेका थिए । त्यतिबेला दुवै क्षेत्रबाट जितेका थिए । २०७० को दोस्रो संविधानसभा चुनावमा पनि उनले त्यही क्षेत्र दोहोर्याए पनि सुनसरीमा जित र मोरङमा हार निकालेका थिए । सप्तरी–२ बाट यसपटक जनमत पार्टीका अध्यक्ष सीके राउत उठ्ने भएपछि हारिने डरले उनले निर्वाचन क्षेत्र फेरेका हुन् । राउतले यादवलाई भेटेर उक्त क्षेत्रमा आफूलाई सहयोग गर्नसमेत भनेका थिए ।

नेपाली कांग्रेसमा सबैभन्दा धेरै क्षेत्रबाट नाम सिफारिस गर्न लगाउने नेतृ हुन प्रधानमन्त्री पत्नी आरजु देउवा । नेपाली कांग्रेसकी केन्द्रीय सदस्यसमेत रहेकी आरजुले आफ्नो नाम पाँच जिल्लाबाट सिफारिस गर्न लगाएकी छन् । उनी ०७४ को निर्वाचनमा कैलाली–५ मा पराजित भएकी थिइन् । यसपटक पनि सोही क्षेत्रबाट उनको नाम सर्वसम्मत सिफारिस भएको छ । तर, त्यसबाहेक डडेलधुरा, बाग्लुङ, बाँके र बर्दियाबाट समेत उम्मेदवारका लागि उनको नाम सिफारिस भएर आएको छ ।

उनको गृहजिल्ला डडेलधुराबाट प्रत्यक्षतर्फ शेरबहादुर देउवाको नाम सिफारिस भएको छ भने समानुपातिकतर्फ राणाको नाम सिफारिस भएको छ । त्यस्तै, बागलुङ–२ र बाँके–३ बाट पनि प्रत्यक्षतर्फ उम्मेदवारका लागि राणाको नाम सिफारिस भएको छ । आफुले दवाव दिएर नाम सिफारिस गर्न लगाएपनि उनले भने स्थानीय नेता कार्यकर्ताले आफ्नो क्षेत्रबाट उम्मेदवार बन्न आग्रह गर्दै नाम पठाएको बताउँदै आएकी छन् । आरजुको माइतीघर रहेको जिल्ला बर्दियाबाट पनि उनको नाम सिफारिस भएको छ । बर्दिया क्षेत्र नं. २ ले उनको नाम पठाएको हो ।

निर्वाचन क्षेत्र फेर्ने नेतामा नेकपा माओवादी केन्द्रका अध्यक्ष पुष्पकमल दाहाल‘प्रचण्ड’ पनि पर्दछन् । २०७४ सम्म उनले निर्वाचन क्षेत्र फेरेको फेरै गरेका थिए । प्रचण्डको नाम चार ठाँउबाट सिफारिस भएको छ । पूर्वप्रधानमन्त्रीसमेत रहेका प्रचण्डले चार ठाँउबाट नाम आएपनि आगामी चुनाव चितवन–३ बाटै लड्ने बताएका छन् । तर पार्टीले भने ४ ठाउँबाट उम्मेदवारका लागि नाम सिफारिस गरेर पठाएको छ । चुनाव क्षेत्र फेरिरहने दाहालले ०७४ मा चितवन–३ बाट जितेका थिए ।

अहिले पनि सो क्षेत्रबाट उनको नाम सर्वसम्मत सिफारिस भएको छ । तर, चितवन दाहालको लागि असुरक्षित हुन सक्ने व्याख्या भइरहेका बेला दाहालको नाम माओवादी केन्द्रको वर्चस्व रहेको क्षेत्र गोरखा–१ बाट पनि सिफारिस भएको छ । त्यस्तै, नवलपुर क्षेत्र नं. १ र बागलुङ क्षेत्र नम्बर २ बाट समेत उनको नाम सिफारिस भएको छ ।

यसअघि ०६४ मा दाहालले रोल्पा–२ र काठमाडौं–१० बाट चुनाव जितेका थिए । तर, ०७० मा उनी काठमाडौं–१० मा दोहोरिन सकेनन् । सिरहा–५ बाट झिनो मतान्तरले चुनाव जिते । ०७४ मा वामगठबन्धन हुँदा चितवन–३ बाट उम्मेदवार बनेका उनी अब फेरि त्यही दोहोरिन चाहन्छन् । तर, त्यो क्षेत्रमा उनको पार्टी तेस्रो स्थानमा रहेकाले उनको जित सहज छैन् । चितवन उनका लागि जोखिम क्षेत्र हो । गठबन्धनकै कारण भरतपुर महानगरपालिका मेयरमा छोरी रेनु दाहाललाई दोहोर्याएका कारण दाहालले चितवनमै आफ्नो जित हुने ठानेका छन् ।

कांग्रेस महामन्त्री गगनकुमार थापा बढी नाम सिफरिस हुने नेताको चौथो नम्बरमा आउछन् । थापाले काठमाडौं–४ बाट लड्ने बताएपनि उनको नाम तीन क्षेत्रबाट सिफारिस भएको छ । नेपाली कांग्रेसको महामन्त्री रहेका गगन थापा काठमाडौं–४ बाट चुनाव लड्ने तयारीमा छन् । ०६४ मा समानुपातिकतर्फ सांसद् बनेका उनी ०७० र ०७४ मा यही क्षेत्रबाट निर्वाचित भएका थिए । तर, यसपटक थापालाई सर्लाही र कास्कीका नेता कार्यकर्ताले समेत आफ्नो क्षेत्रबाट चुनाव लड्न आग्रह गर्दै उनको नाम सिफारिस गरी पठाएका छन् ।

सर्लाही क्षेत्र नं. ४ र कास्की क्षेत्र नं. १ ले प्रतिनिधिसभा सदस्य प्रत्यक्षतर्फ थापाको नाम सिफारिस गरेका छन् । अझ सर्लाही–४ ले त थापाको नाम एकल सिफारिस गरेर पठाएको छ । थापाले भने काठमाडौं–४ मै चुनाव लड्ने प्रस्ट पारिसकेका छन् । यसअघि कास्की–१ बाट उनको नाम सिफारिस भएपछि थापाले आफू काठमाडौं–४ बाटै उम्मेदवारीको तयारी गरिरहेको बताएका थिए । काठमाडौं–४ उनका लानगि यसपटक सहज देखिएको छैन् ।

यो क्षेत्रबाट थापा २५ हजार ५५८ मत ल्याएर निर्वाचित भएका थिए । उनीसँग एमालेका राजन भट्टराई १८ हजार १४० मत ल्याएर पराजित भएका थिए । स्थानीय तहको हेर्दा यहाँ एमालेले १६ हजार ५०७ मत पाएको छ । त्यस्तै कांग्रेसले १५ हजार ७६३, माओवादीले ८८४ मत पाएको थियो । एकीकृत समाजवादीले २ हजार ४१४, जसपाले ३१७ मत प्राप्त गरेको निर्वाचन आयोगको नतिजाले देखाउँछ । यहाँ गठबन्धनसँग १९ हजार ३३८ मत हुन आउँछ । जुन एमालेभन्दा २ हजार ८३१ मतबढी हो । यो क्षेत्रमा राप्रपाले २ हजार २९३ मत पाएको छ । राप्रपा एमालेसँग मिलेर चुनाव लड्दैछ ।

विभिन्न राजनीतिक दलका शीर्ष र लोकप्रिय नेताहरूको नाम पार्टीका तल्ला तहका कमिटीहरूले एकभन्दा बढी ठाउँबाट सिफारिस गरेका हुन् । नेकपा एकीकृत समाजवादीका अध्यक्ष माधवकुमार नेपाल रौतहटका दुवै क्षेत्रबाट उम्मेदवार सिफारिस भएका छन् । पूर्वप्रधानमन्त्रीसमेत रहेका नेपालले यसपटक रौतहटबाट चुनाव लड्ने जनाएका छन् । यसअघि ०७४ मा उनी काठमाडौं–२ बाट विजयी भएका थिए । रौतहटका दुई वटा क्षेत्रबाट नेपालको नाम सिफारिस भएको छ । रौतहट क्षेत्र नं. १ र क्षेत्र नं. ४ बाट उम्मेदवारका लागि नेपालको नाम सिफारिस भएको हो ।

यस्तै नेपाली कांग्रेसका प्रवक्ता प्रकाशशरण महतको नाम काठमाडौं र नुवाकोट गरी दुई क्षेत्रबाट सिफारिस भएको छ । विगतमा नुवाकोटदेखि चुनाव लड्दै आएका महत ०७४ मा भने काठमाडौं–५ बाट चुनाव लडेका थिए । यसपटक पनि काठमाडौं–५ बाटै उनको एकल नाम सिफारिस भएको छ । उता नुवाकोट–१ बाट पनि महतको नाम सिफारिस भएको छ । महतले भने पार्टीले उपयुक्त ठानेको अवस्थामा दुईमध्ये जुनै क्षेत्रमा पनि आफू उम्मेदवार हुन तयार रहेको बताएका छन् ।

कांग्रेस केन्द्रीय सदस्य एवम् उद्योगपति विनोद चौधरी पनि यसपटक प्रत्यक्षतर्फ चुनाव लड्ने तयारीमा छन् । एमाले र कांग्रेसबाट गरी दुई पटक समानुपातिकतर्फ सांसद भइसकेका चौधरी गत मंसिरमा भएको कांग्रेस महाधिवेशनबाट केन्द्रीय सदस्य बनेका थिए । उनी कांग्रेसबाटै चुनाव लड्ने तयारीमा छन् । कांग्रेसले तीन वटा क्षेत्रबाट प्रत्यक्षतर्फ उम्मेदवारका लागि उनको नाम सिफारिस गरेको छ ।

नवलपरासी क्षेत्र नं. १ र नवलपुर क्षेत्र नं. १ र २ बाट प्रत्यक्षतर्फ उम्मेदवारका लागि उनको नाम सिफारिस भएको हो । नवलपुर–१ नेता शशांक कोइरालाले चुनाव लड्दै आएको क्षेत्र हो । ०७४ को निर्वाचनमा कोइराला नै निर्वाचित भएका थिए । नेताहरूका अनुसार चौधरी नवलपुर–२ बाट उम्मेदवार बन्ने तयारीमा छन् ।