अर्जुनचौपारीमा दलित उत्थान समितिको अध्यक्षमा दीपक सुनार, दलित समुदायका कोही पनि नागरिक भोकै बस्न नपर्ने दावी

१ असोज, स्याङजा । स्याङजाको अर्जुनचौपारी गाँउपालिकाका ६ वटै वडाको शनिबार पालिकास्तरीय अर्जुनचौपारी दलित उत्थान समिति गठन भएको छ । अर्जुनचौपारी गाँउपालिका वडा न ४ का सामाजसेवी दीपक बिकको अध्यक्षतामा १३ सदस्यीय पालिकास्तरीय दलित उत्थान समिति गठन भएको हो ।

दलित उत्थान समितिकाे उपाध्यक्षमा वडा न ३ कि रिङ्की नेपाली, सचिवमा भेषकुमार सुनार, सहसचिवमा बिशाल बिक, कोषाध्यक्षमा वडा न ६ दरौका कमला बि क तथा सदस्यहरुमा हिमेश परियार , रामु नेपाली , लक्ष्मी बि.क ,गुरु बहादुर दमाइ, धन बहादुर दमै,आरती सार्की  र टिका बहादुर बि.क रहेका छन् ।

नवनिर्वाचित अध्यक्ष सुनारका अनुसार दलित समुदायको समग्र उत्थान तथा विकास गर्न स्थानीय निकाय, विषयगत कार्यालयहरु तथा गैर सरकारी क्षेत्रबाट संचालित कार्यक्रमहरुलाई पारदर्शी, जनमुखी, प्रभावकारी एवं नतिजामूलक बनाई योजना तर्जुमा गर्न पालिकास्तरीय दलित उत्थान समिति गठन गरिएको हाे ।

यो समितिले दलित लक्षित बजेटलाई व्यवस्थित तरिकाले उपयोग तथा कार्यक्रम सञ्चालन प्रक्रियामा एकरुपता ल्याउने एवं अनुदान रकमलाई स्पष्ट, पारदर्शी र व्यवस्थित गर्न विकाससँग सम्बन्धित कार्यक्रमहरु तर्जुमा, कार्यान्वयन, अनुगमन तथा मूल्याङ्कनमा सहयोग पुर्याउन महत्वपूर्ण भूमिका खेल्ने अध्यक्ष सुनारले नेपालबहस डटकमलाई बताए ।

जातीय विभेद तथा छुवाछूत सर्वप्रथम दलितभित्र रहेको भेदभाव, अन्त्य र दलित क्षेत्रलाई अगाडि बढाउने कार्य गर्न पनि दलित उत्थान समितिले भूमिका खेल्ने अध्यक्ष सुनारले बताए ।

अर्जुनचौपारी गाउँपालिका भित्र रहेका दलित तथा विपन्न परिवारमा उपचार गर्न कठिन भएर घरमै बसेकाहरुलाई आफ्नो पहलमा उपचार गराइरहेका समाजसेवी सुनारले जातीय विभेद अन्त्यका लागि जनचेतनामुलक कार्यक्रम, दलित समुदाय भित्रका सुकुम्बासी तथा अति विपन्न परिवारको पहिचान गरि सम्बन्धित निकायमा खबरदारी गरि राहत उपलब्ध गराउने बताएका छन् । उनले आफ्नो कार्यकालमा पालिका भित्रका दलित समुदायका कोही पनि नागरिक भोकै बस्न नपर्ने बताए ।