राजु गुरुङको मुद्दा ‘हेर्न नभ्याइने’मा

२ कात्तिक, काठमाडौं । रुपन्देही क्षेत्र नं. २ मा सत्ता गठबन्धनका साझा उम्मेदवार नेकपा (एस)का राजु गुरुङले निर्वाचन आयोगविरुद्ध सर्वोच्च अदालतमा दायर मुद्दा हेर्न नभ्याइनेमा परेको छ ।

उम्मेदवारी खारेज गर्ने आयोगको निर्णय खारेज गरी अन्तरिम आदेशको मागसहित दायर मुद्दामा दुवै पक्षबीच छलफलसहित आदेश दिन पर्ने वा नपर्ने निर्णय लिन आज न्यायाधीश सुष्मालता माथेमा र कुमार रेग्मीको संयुक्त इजलासमा पेसी परेको थियो । मुद्दा इजलासमा ४४ नम्बरमा परेको थियो । मुद्दा सुनुवाईको चाप बढेपछि गुरुङको मुद्दलाई ‘हेर्न नभ्याइने’मा राखिएको जनाइएको छ ।

बैंकिङ कसुरमा कालो सूचीमा परेको भन्दै निर्वाचन अधिकृतको कार्यालयले गुरुङको उम्मेदवारी उक्त क्षेत्रबाट खारेज गरेको थियो । आयोगको खारेजी निर्णय कानूनविपरीत भएको जनाउँदै उनले अन्तरिम आदेशको माग गर्दै गएको हप्ता सर्वोच्चमा रिट दायर गरेका थिए ।

रिटमा प्रारम्भिक सुनुवाइ गर्दै सर्वोच्च अदालतले यसअघि उम्मेदवारी खारेज गर्ने निर्णय तत्काल कार्यान्वयन नगर्न न्यायाधीश विश्वम्भरप्रसाद श्रेष्ठको एकल इजलासले आइतबार अल्पकालीन अन्तरिम आदेश जारी गरेको थियो । मुद्दामा अन्तरिम आदेश दिने कि नदिने सम्बन्धमा रिटका दुवै पक्षलाई मंगलबार बोलाइएको थियो ।