मन्त्री टुंग्याउन देउवाले धुम्बाराहीमा बोलाए आकस्मिक बैठक

१६ चैत, काठमाडौं । नेपाली कांग्रेसका सभापति शेरबहादुर देउवाले पार्टीको केन्द्रीय कार्यसम्पादन समितिको बैठकबाट निर्णय नगराई प्रचण्ड नेतृत्वकाे सरकारमा कांग्रेसबाट मन्त्रीमा पठाउनेको नाम छनोट गरी अन्तिम निर्णय गर्न धुम्बाराही निवासमा आकस्मिक बैठक बोलाएका छन् । उनले मन्त्रीको नाम टुंग्याउन नेताहरुलाई निवासमा बोलाएको एक नेताले नेपालबहसलाई जानकारी दिए ।

उनले आगामी बैशाख १० मा हुने उपनिर्वाचनमा लागि तनहुँ १ बाट गोविन्द्र भट्टराई र चितवन २ बाट जीतनारायण क्षेष्ठलाई पार्टी बाट उम्मेदवार बनाउने निर्णय गराएर मन्त्री छान्ने बैठक धुम्बाराहीमा बोलाएका हुन् । कांग्रेसबाट सरकारमा सहभागी हुने मन्त्रीको नाम दिउँसो २ बजेभित्र बुझाउनुपर्ने छ ।

यसअघि सानेपास्थित केन्द्रीय कार्यलयमा बसेको बैठकबाट तनहुँ–१ मा गोविन्द भट्टराई र चितवन–२ मा जीतनारायण श्रेष्ठलाई उमेदवार बनाउने निर्णय भएको थियो । मन्त्रीको अन्तिम नाम र मन्त्रालय टुंगो लगाउन सभापति निवास धुम्बाराहीमा बैठक खाना खाएर बस्ने गरी बोलाइएको छ । सत्ता गठबन्धनको बैठक अपराह्न २ बजे बस्दै छ । बैठक अगावै कांग्रेसले मन्त्री टुंगो लगाउने ती नेताले जानकारी दिए ।