बारा-२ मा उम्मेदवार छान्न एमालेलाई कठिन, तनहुँ र चितवनमा चयन

१८ चैत, काठमाडौं । कडा प्रतिस्पर्धा हुने भएपछि नेकपा एमालेले बारा–२ मा छाडेर तनहुँ १ र चितवन २ मा उम्मेदवार चयन गरेको छ । एमालेले बाराको राजनीतिक अवस्था अत्यन्तै तरल भएको भन्दै थप छलफल गरेर उम्मेदवार टुंग्याइने जिम्मा शीर्ष नेतलाई दिएको छ । वैशाख १० मा हुने उपचुनावका लागि चितवन २ र तनहुँ १ को उम्मेदवार भने चयन भएका छन् ।

आज शनिबार बसेको एमाले सचिवालय बैठकले तनहुँ १ मा सर्वेन्द्र खनाललाई र चितनव २ मा रामप्रसाद न्यौपानेलाई उम्मेदवार बनाउने निर्णय गरेको छ । पार्टी कार्यालयमा शनिबार बसेको सचिवालय बैठकले बारा–२ का लागि भने उम्मेदवार टुंग्याउन नसकि बैठक उठेको प्रचार विभाग प्रमुख पृथ्वी सुब्बा गुरुङले जानकारी दिए ।

उनले बारा–२ को राजनीतिक अवस्था अत्यन्तै तरल भएकोले थप छलफल गरेर आइतबार उम्मेदवार टुंग्याइने उनले बताए । तनहुँबाट उम्मेदवार बन्न लागेका खनाल पूर्वप्रहरी महानिरीक्षक हुन् । यसअघिका उम्मेदवार एकबहादुर गुरुङ र तनहुँका सिनियर नेता किरण गुरुङले उपचुनावमा नउठ्ने भनेपछि खनालले उम्मेदवार हुनका लागि एमाले तनहुँ जिल्ला कमिटीमा निवेदन दिएका थिए ।

खनाल गत मंसिरको चुनावमा काठमाडौं ६ मा राष्ट्रिय स्वतन्त्र पार्टीका शिशिर खनालसँग पराजित भएका थिए । चितवन २ मा उम्मेदवार बन्न लागेका न्यौपाने एमाले चितवन जिल्ला कमिटी अध्यक्ष हुन् । जिल्ला कमिटीले न्यौपानेलाई उम्मेदवार बनाउन सिफारिस गरेको थियो । न्यौपान गत मंसिर ४ गतेको निर्वाचनमा चितवन क्षेत्र नं. ३ बाट एकल सिफारिस भएर पनि उम्मेदवार बन्न पाएका थिएनन् ।

एमाले विद्यार्थी संगठन अनेरास्ववियूमा आवद्ध भएर २०५३ सालदेखि नै पूर्णकालीन भएका न्यौपाने युवा नेता मानिन्छ । बारा क्षेत्र नम्बर–२ को उमेदवार अब पार्टी हेडक्वार्टरले टुंग्याउने छ । आउँदो वैशाख १० गते यी तीन क्षेत्रमा उपनिर्वाचन हुँदैछ । त्यसका लागि यही वैशाख २० गते उमेदवारको मनोनयनपत्र दर्ता गरिने निर्वाचन आयोगको कार्यतालिका छ ।