बारा–२ मा जसपाका यादव र एमालेका पौडेलले गराए उम्मेदवारी दर्ता

२० चैत, बारा । बैशाख १० मा हुन गइरहेको प्रतिनिधिसभा उपनिर्वाचनका लागि बारा–२ मा सत्ता गठबनधनका तर्फबाट जनता समाजवादी पार्टीका अध्यक्ष उपेन्द्र यादव र विपक्षी दल नेकपा एमालेका पुरुषोत्तम पौडेल उम्मेदवारी दर्ता गराएका छन् ।

यादवले पार्टी नेता कार्यकर्तासहित निर्वाचन अधिकृतको कार्यालय पुगेर उम्मेदवारी दर्ता गराएका थिए । सो क्षेत्रमा रास्वपाले रमेश खरेल उम्मेदवार बनाएको छ । यादवको प्रस्तावकमा नवलकिशोर यादव र समर्थकमा नारायण यादव रहेका छन् । एमालेका पौडेलको प्रस्तावकमा बलवीर चौधरी र समर्थकमा बन्दना सिंह रहेका छन् ।

बारा २ मा एमालेका उम्मेदवार पुरुषोत्तम पौडेलले कलैयास्थित मुख्य निर्वाचन अधिकृतको कार्यालय पुगेर उम्मेदवारी दर्ता गराएका हुन् । जसपाका उपेन्द्र यादवले उम्मेदवारी दर्ता गरेलगत्तै एमालेका पौडेल उम्मेदवारी दर्ता गराएका थिए । राष्ट्रिय स्वतन्त्रत पार्टीका रमेश खरेल उम्मेदवारी दर्ता गर्न निर्वाचन कार्यालय पगेर चन्दन साहको समर्थन र प्रस्तावकमा ममता शर्मालाई रखेर उम्मेदवार दिर्ता गराएका छन् ।

मनोनयन दर्ता पछि संक्षिप्त प्रतिक्रिया दिँदै नेता पौडेलले आफूले चुनाव जित्ने दावी गरे । ‘बारा–२ ०४८ सालमा एमालेले जितेको क्षेत्र हो, ०५६ सालमा पार्टी फुट्दा पनि एमालेले जितेको क्षेत्र हो’, उनले भने, ‘अहिले फेरि जित्ने संकेत आएको छ । एमालेका कार्यकर्ता मात्रै हैन, न्यायप्रेमी जनता, मजदुर, किसान, महिला, दलित, मधेसी, मुस्लिम उत्पीडित वर्ग जाति एमालेको पक्षमा खडा छन् ।’ बारा– २ मा गठबन्धनले काम नगर्ने उनको भनाइ छ ।