विराटनगर महानगरले सडक पार्किङमा कडाई गरेपछि व्यापारीहरू आक्राेशित

२१ चैत, विराटनगर । विराटनगर महानगरपालिकाले बजार क्षेत्रमा सवारी पार्किङलाई कडाइ गरेको छ । यसअघि गरिएको पार्किङ निषेधित क्षेत्र तोक्ने निर्णयलाई थप प्रभावकारी रुपमा कार्यान्वयन गर्न महानगर लागिपरेको छ ।

सोमबार महानगरका मेयर नागेश कोइरालाको अध्यक्षता बसेको बैठकले स्थानीय प्रशासन, नेपाल प्रहरी, ट्राफिक प्रहरीसहित सरोकारवाला निकायसँगको समन्वयमा यसअघि कार्यान्वयनमा ल्याएका सबै सडकलाई पार्किङ निषेधित क्षेत्र प्रभावकारी रुपमा कार्यान्वयन गर्ने निर्णय गरेको जनाइएको छ ।

पार्किङलाई व्यवस्थित गर्दै संयुक्त बजार अनुगमनलाई सूक्ष्म रुपमा अघि बढाउने, राजस्व अभिवृद्धि अभियानलाई थप प्रभावकारी रुपमा सञ्चालन गर्ने निर्णय गरेको मोरङका प्रमुख जिल्ला अधिकारी तीर्थराज भट्टराईले बताए ।

प्रदेश राजधानीमात्रै नभएर विराटनगर कोशी प्रदेशको एक मात्र महानगरपालिकालाई व्यवस्थित बनाउने दायित्व सबैको भएकाले महानगरले सुरु गरेको अभियानमा स्थानीय प्रशासनले सहयोग गर्ने भट्टराईले बताए ।

बजार क्षेत्रमा पार्किङ हटाउने निर्णयले व्यापार सुस्ताएको भन्दै व्यापारीहरूले आपत्ति जनाउँदै आइरहेका छन् । उनीहरुले आफ्ना सवारी साधन सडकमा राखेर नो पार्किङको अवज्ञा गरेका छन् । पार्किङ हटाउने निर्णयले ग्राहक मास्ने काम गरेकाे भन्दै उनीहरू आक्राेशित बनेका छन् । उनीहरूले सडकमा निर्णयविराेधमा पाेष्टरिङ सुरू गरेका छन् ।

उता पार्किङ हटाउने अभियानबाट पछि जनस्तरबाट महानगरपालिकामाथि चर्को दबाब आएको मेयर कोइरालाले बताए ।

यता काठमाडौं महानगरपालिकाले यसअघि देखिनै सडक र फुटपाथ पार्किङ र व्यापारलाई निषेध गर्दै आइहरेको छ ।