देशभरका भूमिहीनहरूलाई लालपुर्जा दिने तयारीमा छुः मन्त्री श्रेष्ठ

५ वैशाख, काठमाडौं । भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठले देश भरका भूमिहीनहरुलाई सकेसम्म यसै कार्यका लालपुर्जा दिने गरी मन्त्रालयले काम गरिरहेको बताएकी छन् । उनले आफ्नो कार्यकालमा भूमिहीनहरूलाई लालपुर्जा दिने लक्ष्य राखेको बताएकी छिन् ।

प्रतिनिधिसभाको मंगलबारको बैठकमा संसदमा उठेका प्रश्नहरुको जवाफ दिने क्रममा मन्त्री श्रेष्ठले देशभर लाखौँ जनता भूमिविहीन र गरिबीबाट ग्रस्त रहेको उनीहरुको टाउको लुकाउने बास पनि नभएको बताइए । उनले सबै किसिका भूमिहीनहरुको लागत बुझेर मात्र पुर्जा वितरण गरिने बताइन् ।  

उनले भनिन्, ‘जमिन खनजोत गर्नेहरूको हो, त्यसैले हलिया, कमैया, हरवाचरवा, मुसहर, डोम, चेपाङ आदि भूमिहीनहरूले जमीनको लालपुर्जा पाउनैपर्छ । हजारौँ वर्ष हजारौँ मिटर जमीन जोत्नेहरूसँगै पाँच अम्मल जमीन पनि छैन,’ उनले भनिन्, ‘त्यसैले भूमिहीनहरूलाई लालपुर्जा दिने मेरो लक्ष्य छ ।’
उनले विगत लामो समयदेखि भुमिहीन र सुकुम्बासीको समस्या समाधान हुन नसकेको भन्दै छिटोभन्दा छिटो सुकुम्बासी समस्या समाधानका लागि पहल गर्ने प्रतिबद्धता जनाइन् । उनले राष्ट्रिय भूमि आयोगले १०९० वटा पुर्जा बनाएको र ५०० भन्दा धेरै पुर्जा वितरण गरेको जानकारी गराइन् ।