नक्कली भुटानी शरणार्थी प्रकरणकाे अनुसन्धानमा ओहदा र शक्तिको प्रभाव नहोस् : गगन

२१ वैशाख, काठमाडौं । नेपाली कांग्रेसका महामन्त्री एवं सांसद गगनकुमार थापाले नक्कली भुटानी शरणार्थी बनाएर ठगी गर्ने उच्च ओहदाका जोसुकैलाई कारबाहीको दायरामा ल्याउन सरकारको ध्यानाकर्षण गराएका छन् ।

उनले प्रकरणमा तानिएका भीआईपीहरुलाई समेत कारबाहीको दायरामा ल्याएर राम्रो काम गरिरहेको भन्दै गृह प्रशासनको कार्यको प्रशंसा समेत गरेका छन् । 

उनले ठगी गिरोहमा भीआईपीहरुको जालो छर्लङ्ग हुँदै गइरहेको र कानुनभन्दा माथि कोही नरहेको भन्दै यसमा मुछिएका कसैलाई नछुटाइ कारबाही गर्न सम्बन्धित निकायकाे ध्यानाकर्षण गराएका छन् । ठगीलाई उनले ‘प्रवृत्ति’काे संज्ञा दिएका छन् ।

‘नक्कली भुटानी शरणार्थी बनाएर लैजाने ठगी प्रकरणको अनुसन्धानका क्रममा ठगी  गिरोहको भीआईपी जालो उजागर हुँदै गएको छ। यो प्रकरणमा गृह प्रशासनको प्रयास प्रशंसनीय छ । यो घटना होइन प्रवृत्ति हो‘ उनले बिहीबार ट्वीट गर्दै भनेका छन्, ‘अझै गहिरोसँग अनुसन्धान होस्। कोही नछुटुन। संलग्न जोसुकै, जुनसुकै ओहदा र शक्तिको होस्, कानुनभन्दा माथि कोही हुँदैन । ’