२२७ किलो गाँजासहित २ जना पक्राउ

२१ वैशाख, विराटनगर । सशस्त्र प्रहरीले सुनसरीको  धरानबाट आठ बोरा गाँजासहित दुई युवकलाई पक्राउ गरेको छ । बिहीबार बिहानका राति आठ बोरामा राखिएको २२७ किलो गाँजासहित दुई जनालाई नियन्त्रणमा लिएको हो ।

धरान उपमहानगरपालिका–१३ स्थित शिवधारा चेक प्वाइन्टबाट प्रदेश १–०२–००१ ख ९४८९ नम्बरको मिनी ट्रकमा चेकजाँचका क्रममा  ८ गाँजा बरामद भएको सशस्त्र प्रहरी बलका कोशी प्रदेश कार्यालयले जनाएको छ ।

सशस्त्र प्रहरी बल नेपाल सुरक्षा बेस धरानबाट खटिएको टोली आज बिहान राति साढे १ बजे  २ सय २७ किलो गाँजासहित ट्रक चालक धनकुटाको छथरजोरपाटी गाउँपालिका–६ सिँधुवाका ३४ वर्षीय चन्द्र थापा क्षेत्री र सहचालक छथरजोरपाटी – २ ओख्रेका २८ वर्षीय चूणामणि कटवाललाई पक्राउ गरेको हो ।

पक्राउ परेका व्यक्तिसहित लागुऔषध गाँजा र ट्रकलाई आवश्यक अनुसन्धान एवं कारबाही अघि बढाउन इलाका प्रहरी कार्यालय धरानको जिम्मा लगाइएको सशस्त्र प्रहरी बल सुनसरीका प्रहरी उपरीक्षक लकेशकुमार तुम्बाहाम्फेले  बताए । यसअघि सशस्त्र प्रहरीले सुनसरीबाले गत फागुन १५ गते २५८ र फागुन ४ गते २८ किलो गाँजा बरामद गरेको थियो ।