पोल्ट्री व्यवसायी कँडेलको ‘आत्महत्या’ दुरुत्साहन मुद्दामा १ जना पक्राउ, अर्का फरार

२२ वैशाख, चितवन । चितवनका पोल्ट्री व्यवसायी शंकर कँडेलको ‘आत्महत्या’ दुरुत्साहन मुद्दाका अभियुक्तमध्ये १ जनालाई प्रहरीले पक्राउ गरेको छ । अर्का एक जना भने फरार रहेका छन् । 

पक्राउ पर्नेमा अनमोल फिड्सका चार्टर्ड अकाउन्टेन्ट ३६ वर्षीय जीवन रावल रहेका छन् । बझाङको छबिसपाथिभेरा गाउँपालिका–१ का रावललाई बाराको जितपुर सिमरा उपमहानगरपालिका–२ बाट पक्राउ गरिएको हो । अर्का आरोपी प्रदीप रुङ्गटा फरार रहेको प्रहरीले जनाएको छ । उनको खोजी भइरहेको जनाइएको छ । 

रावल र रुंगटाले कंँडेलबाट कम्पनीको शेयर खरिद गरेर पैसा नदिई आर्थिक तनावमा पारेको र तनावकै कारण आत्महत्या गरेको उजुरी परेको छ । 

रावल र रुंगाटा कँडेलका व्यापार साझेदार हुन् । ऋण तिर्न भन्दै कँडेलले अनमोल फिड्सको ८५ प्रतिशत शेयर दुवै जनालाई कम्पनीको शेयर बिक्री गरेको तर पैसा पाउन नसकिरहेको बेला उनलाई ऋणको मार खेप्न नसकी आत्महत्याको बाटो रोज्न बाध्य पारेको उजुरीमा जनाइएको छ । उजुुरी कँडेल पत्नीले दिएकी छन् । 

नेपाली कांग्रेस चितवनका पूर्वकोषाध्यक्ष समेत रहेका यही कँडेल मंगलबार साँझ नारायणगढस्थित आफ्नै कार्यालयमा झुण्डिएको अवस्थामा मृत फेला परेका थिए । घटनास्थलमा भेटिएको सुसाइड नोटमा रुङ्गटा र चार्टर्ड अकाउन्टेन्ट रावलले पैसा नदिई उल्टै तनाव र मानसिक पीडा दिएको उल्लेख रहेको प्रहरीले जनाएको छ ।