नक्कली नोट प्रयोग गरी सामान किनेको अभियोगमा २ जना पक्राउ

२२ वैशाख, काठमाडौं । नक्कली नोट प्रयोग गरी सामान खरिद गरेको आरोपिमा प्रहरीले काठमाडौंबाट २ जनालाई पक्राउ गरेको छ । पक्राउ पर्नेमा जाजरकोट घर भई हाल टोखा नगरपालका–७ बस्‍ने ३१ वर्षीय सम्झना गहतराज र बाँकेको नेपालगञ्‍ज घर भई हाल काठमाडौंको बागबजार बस्ने ३२ वर्षीय सादाहय हलुवाइ रहेका छन् ।

प्रहरी वृत्त बौद्धबाट खटिएको टोलीले विशेष सूचनाको आधारमा उनीहरुलाई पक्राउ गरेको हो । हलुवाइ युनिक होटलमा कोठा लिई बस्‍ने गरिएको खुलेको छ । 

गहतराजले गोकर्णेश्वर ननगरपालिका–६ नँया बस्तीमा एक किराना पसलमा रिचार्ज कार्ड किन्ने क्रममा नक्कली नोट दिएको पाइएको छ । नक्कली नोट कारोबारको सूचना पाएपछि खटिएको प्रहरी टोलीले गहतराजलाई नियन्त्रणमा लिएको र उनकै बयानमा आधारमा हलुवाइलाई समेत नियन्त्रणमा लिइएको हो । 

पक्राउ गरिएका अभियुक्तहरुको साथबाट प्रिन्ट गरेर बजार पु्याउन तयारी अवस्थामा राखिएका १ हजार दरका नक्कली नोट ४९ वटा,  ५ सयको नोट २ वटा, प्रिन्ट गरेको काट्न ५ सयको नोट ६० वटा, काट्न बाँकी एक हजारको १२६ वटा लगायत नक्कली नोट बनाउन प्रयोग गरिने सामानहरु बरामद गरेको प्रहरीले जनाएको छ ।

उनीहरुलाई प्रहरी वृत्त बौद्ध राखिएकाे छ । उनीहरूलाई बरामद नोटसहित शुक्रबार सार्वजनिक गरिएको छ । घटनाबारे आवश्यक अनुसन्धान भइरेहको प्रहरीले जनाएको छ ।