अबदेखि १२ कक्षामा ‘नन ग्रेड’ प्राप्त विषयको मात्र पुनः परीक्षा दिनुपर्ने

२२ वैशाख, काठमाडौं । कक्षा १२ का विद्यार्थीले एनजी नन ग्रेड (एनजी) आएको विषयमा मात्र ग्रेड वृद्धि परीक्षा दिनुपर्ने भएका छन् । सरकारले लेटर ग्रेडिङ  निर्देशिका, २०७८ संशोधन गर्दै जति वटा विषयमा एनजी आएको छ त्यो विषयमा मात्र परीक्षा दिनुपर्ने व्यवस्था गरेको छ ।

यसअघि दुईभन्दा बढी विषयमा एनजी ल्याएको अवस्थामा अर्को वर्ष सबै विषयको परीक्षा दिनुपर्ने व्यवस्थालाई परिवर्तन गरी बिहीबार बसेको मन्त्रीस्तरीय बैठकबाट जति विषयमा एनजी प्राप्त छ, ती विषयको मात्र परीक्षा दिन पाइने व्यवस्था गरिएको हो । तर दुई वटासम्मलाई सोही वर्ष र त्योभन्दा बढी विषयमा एनजी भएमा चाहिं उक्त विषयको परीक्षा अर्को वर्ष मात्र दिन पाइनेछ । साथै उक्त विषय ३ वर्षसम्म दिन सकिने राष्ट्रिय परीक्षा बोर्डले जनाएको छ । 

दुई विषय भन्दा माथि विषयमा एनजी लाग्दा सोही कक्षामा दोहोर्‍याएर पढ्न अथवा सबै विषयको परीक्षा दिने गाह्रोले कतिपय विद्यार्थी पढ्न छोड्ने भएकोले त्यसलाई रोक्न व्यवस्थामा सुधार गरिएको बोर्डको दाबी छ ।