११ तोला सुनका गहनासहित विराटनगरबाट २ जना पक्राउ

२६ वैशाख, विराटनगर । प्रहरीले ११ तोला सुनसहित विराटनगरबाट दुई जनालाई पक्रउ गरेको छ । उनीहरुलाई गएराति पक्राउ गरेको हो । पक्राउ पर्नेमा  सुनसरीको इटहरी उपमहानगरपालिका–१० घर भई विराटनगर महानगरपालिका–९ ठाकुरबारी रोड बस्दै आएका ४५ वर्षीय इन्द्र विक र ४० वर्षीय गोविन्द विक रहेका छन् । 

उनीहरु बागमती प्रदेश ०१–०२८ च २८४६ नम्बरको कारमा सवार रहेका र राति ९ बजेतिर रोडस्थित आरके जेम्स ज्वेलर्समा गहना बेच्न खोज्दै गर्दा उनीहरूलाई अनुुन्धानका लागि पक्राउ गरिएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए । कारलाई पनि नियन्त्रण्मा लिइएको छ ।

उनीहरुको साथबाट पोतेमा प्रयोग गरिने विभिन्न डिजाइनका २ सय ३९ थान सुनका गहना बिना बिलको रहेको पाइएपछि सुनसहित पक्राउ गरिएको हो । उनीहरुको साथबाट नगद ९८ हजार ३ सय रूपैयाँ पनि बरामद भएको प्रहरीले जनाएको छ । 

अभियुक्तहरुले भने इटहरीमा आफूहरूको सुनका गहना बनाउने कारखान रहेको र विराटनगरका व्यापारीले अर्डर गरे अनुसारको सुनका गहना तयार पारेर बिक्रीका लागि ल्याउने गरिएको बयान दिएको बताइन्छ ।